Preparendi is ùrtimus artìculus, siat po sa revista de Ite mi Contas, siat po custu situ, apu fueddau prus de una borta de "programas a 16 bit", o a 32 o a 64. Sendi chi no funt totus bastanti espertus de sciri giai ita bolit nai, in s'incumentzu apu circau de ddu spricai in s'artìculu etotu, ma bessiat tropu longu, pruschetotu po sa revista; apu duncas circau de evitai de ndi fueddai, ma candu si scriit in contu de sistemas operativus, arribat su momentu innui tocat amarolla. Apu decìdiu duncas de ndi fai un'artìculu separau.

Mentris fia preparendi s'artìculu in contu de su Fairphone po su nùmeru 3 de sa revista de Ite Mi Contas est bessida sa versioni noa de su telefoneddu èticu. S'artìculu est arrannèsciu bene, calincunu mi-dd'at fintzas bantau e mi fait prexeri mannu, ma si fait riferimentu a is piessìnnius de sa versioni 5, duncas andaus a biri ita est cambiau in sa 6.

Fiant is 12:40, prus o mancu, candu apu intèndiu su "bip bip bip" de su grupu de continuidadi chi mi sinnalàt chi si-nci fiat andada sa luxi.
Eventus che custu no funt stròlicus in domu mia, ca totu est elètricu, incumintzendi de su buddidori de s'àcua finas a sa coxina, duncas a bortas su furru ndi fait sartai su sarvavida, ma custa borta fiat diferenti.

Torraus a fueddai de Meta AI. Mentri fia scriendi s'ùrtimu artìculu, apo decìdiu de fai una proa cun su chatbot de Meta, a birri si cumprendiat su sardu. S'arresurtau est de interessu.

Calincunu forsis si-nd'est acatau: in Telegram sa barra chi amostàt is istòrias no si biit prus. Fait ancora a biri is postadas bècias in su profilu ma no ddoi est prus sa possibilidadi de ndi creai noas. Custu acuntessit siat cun su telefoneddu siat in sa versioni Desktop.

Pagus diis a imoi, sa polìtica de riservadesa de Firefox est stètia arrangiada, creendi orriolu e discuntentu intra is impitadoris. S'est tratau de carraxu in debadas, unu disatinu o si prefereis una gaffe, ma su dannu est fatu.

Forsis is prus giòvunus no dd'iant mancu mai intèndia, ma Skype, app chi permitit de scambiai messàgius e tzerriadas (tipu Whatsapp, Telegram, etc), est stètia de importu mannu po genti meda me is annus 2000 e sa prima parte de is 2010. Est stètia difatis una de is primas, e sa prus arrannèscia in giru de is annus 2010, chi permitiant de telefonai a traessu de Internet impreendi unu PC e, apustis, unu telefoneddu. Microsoft at comunicau chi dd'at a serrai ocannu, 2025, in maju.

Sa possibilidadi de agrupai is schedas in unu navigadori esistit giai in Chromium e derivaus (Google Chrome, Opera, Vivaldi, etc), mentris amancat ancora in Firefox. In manera ofitziali, assumancu. Esistint difatis de diora estensionis chi permitint de agiungi custa funtzioni e un'annu a oi prus o mancu si fueddàt giai de unu suportu nadiu, chi impitadoris medas domandànt. Custu suportu imoi esistit, ma est ancora unu sperimentu e duncas est cuau comenti a cunfiguratzioni predefinida. Innoi si spricu comenti si fait a dd'ativai.

Circhendi prus informatzionis in contu de IT Wallet e cumentus de chini dd'est sperimentendi apu agatau unus cantu grupus chi funt spainendi un'oriolu mannu: IT Wallet imbiat is datus tuus a is Stadus Aunius. Iat a essi grai, ca su Regolamentu Generali po s'Amparu de is Datus de s'Unioni Europea proibit de memorizai datus de is impitadoris in serbidoris chi no siant in s'Unioni, ma no si depeus apensamentai po custu, ca tanti sa noa si fundat asuba de una faddina manna, chi imoi si spricu.