Firefox e su disatinu in contu de sa privatesa

Pagus diis a imoi, sa polìtica de riservadesa de Firefox est stètia arrangiada, creendi orriolu e discuntentu intra is impitadoris. S'est tratau de carraxu in debadas, unu disatinu o si prefereis una gaffe, ma su dannu est fatu.

Sa versioni annoada de sa polìtica at donau a is impitadoris s'idea chi Mozilla, comenti asiendas medas chi oindii guadàngiant cun is programas po PC e telefoneddu, bolessit arragolli datus po ndi fai profetu bendendi-ddus a àteras asiendas e sa cosa est essida in pagu tempus unu meme chi ancora arròlliat in totu is pàginas de informàtica de is arretzas sotzialis. Custu si depit po su prus a su fatu chi Firefox est publicizau comenti a navigadori indipendenti, seguru e privau e duncas a tesu meda, po nai, de is polìticas de Google chi fait profetu pruschetotu de is datus de is usuàrius. Mozilla at spricau sa malintèndida e at torrau a cambiai sa polìtica po ndi bogai sa parti noa, ma una noa mala de custu tipu est che unu fogu chi no fait prus a studai: fait dannus chi benit mali meda a arrangiai.

Firefox est stètiu su navigadori chi at truncau su monopòliu de Internet Explorer, su chi finas a su 2012 est stètiu su prus spainau. Cun su tempus perou, finas Firefox at patiu sa cuncurrèntzia de Chrome e de totu is àterus chi impreant su pròpiu còdixi (Chromium, Edge, Opera, Vivaldi, etc), calendi a una spainadura intra su 2% e su 6% (dipendit de chini fait sa mesura). Est ancora unu navigadori bonu meda, indipendenti de is bitzos de Google e, po imoi, s'ùnicu a disponimentu in lìngua sarda.