Firefox e su disatinu in contu de sa privatesa

Pagas dies a immoe, sa polìtica de riservadesa de Firefox est istada arrangiada, creende oriolu e discuntentu intra is impitadores. S'est tratadu de carràrgiu in de badas, unu disatinu o si preferides una gaffe, ma su dannu est fatu.

Sa versione annoada de sa polìtica at donadu a is impitadores s'idea chi Mozilla, comente aziendas medas chi oe in die balàngiant cun is programmas pro PC e telefoneddu, boleret regòllet datos pro nde fèghere profetu bendende·ddos a àteras aziendas e sa cosa est essida in pagu tempus unu meme chi ancora arròlliat in totu is pàginas de informàtica de is retzas sotziales. Custu si depet pro su prus a su fatu chi Firefox est publitzizadu comente a navigadore indipendente, seguru e privadu e duncas a tesu meda, pro nàrrere, dae is polìticas de Google chi faghet profetu prus che totu de is datos de is usuàrios. Mozilla at ispricadu sa malintèndida e at torradu a cambiare sa polìtica pro nde bogare sa parte noa, ma una noa mala de custu tipu est che unu fogu chi non faghet prus a istudare: faghet dannos chi benit male meda a arrangiare.

Firefox est istadu su navigadore chi at truncadu su monopòliu de Internet Explorer, su chi finas a su 2012 est istadu su prus ispainadu. Cun su tempus però, finas Firefox at patidu sa cuncurrèntzia de Chrome e de totu is àteros chi impreant su pròpiu còdighe (Chromium, Edge, Opera, Vivaldi, etc), calende a un'ispainadura intra su 2% e su 6% (dipendet de chie faghet sa mesura). Est ancora unu navigadore bonu meda, indipendente dae is bitzos de Google e, pro immoe, s'ùnicu a disponimentu in lìngua sarda.