Programmas po elaboradori

Firefox est incumintzendi a chistionai sardu

Situ de Firefox Nightly - Màgini de Sardware

Firefox, unu de is prus navigadoris web impreaus in su mundu, est a disponimentu in versioni Nightly in sardu.
Nd'at donau s'annùntziu Sardware, chi est aprontendi sa furriadura, ariseu 16 de donniasantu.
Sa Nightly est una versioni chi includit is ùrtimus càmbius, mancai custus potzant essi pagu stàbilis, innantis chi siant publicaus in una versioni bera de su programa. Sa lìngua sarda est prus o mancu a su 33%, duncas partis medas de testu ant a essi amostadas in inglesu, ma est un'incomentzu po podi sighi a traballai cun s'agiudu de sa comunidadi, chi podit cunsillai càmbius e sinnalai faddinas. Fatu custu, su sardu at a bessiri una de is lìnguas ofitzialis de Firefox candu lompit a su 100% de sa tradutzioni. Agiungu innoi s'annùntziu ofitziali de Sardware, cumbidendi a totus a proai Firefox in sardu e agiudai, si bolint. Pregontas, sinnalatzionis e cunsillus podint essi fatus in su Grupu Telegram de Sardware.

Linux at fatu 30 annus

Tux, sa mascotte de Linux

Linux, su nùcleu (kernel) chi at permìtiu sa creatzioni de unu nùmeru mannu de sistemas operativus, at fatu 30 annus. Sa versioni 0.1 sua est de su 1991, candu Linus Torvalds, chi insandus studiàt informàtica in s'Universidadi de Hèlsinki, iat incumentzau a scriri unu sistema operativu po sperimentai sa prataforma Intel 386 e poita ca fiat pagu cuntentu de su sistema Minix de su prof.Andrew S.Tanenbaum.

Publicau Haiku R1/beta3

Haiku Beta 3 in esecutzioni

De Haiku eus giai chistionau innoi e in su diàriu de Bideas puru. Est su sistema operativu in svilupu cun sa punna de fruniri unu sistema cumpatìbili cun BeOS, lìberu, eficienti e fàcili de impreai e programai.
Tres diis a oi, su 25 de argiolas, est bessia sa de tres versionis beta. Beta, dd'aregordaus, bolit nai chi su sistema est cumpletu ma iat a podi tenni ancora calincuna faddina e duncas no est dessintotu prontu po s'impreu de dònnia dii.

Microsoft si preparat a publicai Windows 11?

Una de is màginis de su sistema nou, publicada de si situ cinesu Tieba Baidu

S'est chistionendi meda me is ùrtimus diis de s'annùntziu de una versioni noa de Windows chi Microsoft iat a depi fai su 24 de làmpadas. No si sciit meda e segundu unus cantu narìngius no ddoi at essi una versioni noa, ma un'annoamentu mannu de Windows 10, chi dd'ant a nai Windows 10 Sun Valley, sighendi su stili de Mac OS X po is nòminis de sistema e pighendi elementus de un'àtera versioni cancellada de Windows, sa 10X. Comentisisiat, The Verge at publicau un'artìculu chi amostat unas cantu màginis de Windows 11 chi parint cunfirmendi chi Microsoft siat acanta de dd'annuntziai.

WSL podit esecutai aplicatzionis cun interfaci gràfica

Màgini de CoxinhaFotos pigada de Pixabay

Po is chi no ddu connoscint, WSL (Windows Subsystem for Linux) est unu suta-sistema chi permitit de esecutai aplicatzionis po Linux in unu sistema Windows 10. Installendi-ddu est possìbili a impreai custus programas comenti chi fessint trastus po sa lìnia de cumandu chena depi impreai una màchina virtuali comenti VirtualBox o VMWare. A incumentzai de Windows 10 Build 21364 fintzas is programas cun interfaci gràfica ant a essi suportaus.

Impreai su Messenger de Facebook in Linux - 2

Franz in Mint Cinnamon

Eus giai biu comenti impreai su Messenger de Facebook in Linux gràtzias a un'estensioni de Pidgin. A dolu mannu, custa solutzioni nos'òbligat a renuntziai a sa parti manna de is funtzionalidadis de Facebook, comenti s'imbiu de fotografias, vìdeus, archìvius e messàgius de boxi, poita ca s'estensioni po Pidgin no ndi frunit suportu po imoi. Andaus a biri duncas àteras 3 solutzionis basadas apitzus de s'aplicatzioni Web ofitziali de Facebook.

Etichette

Scoberta una debilesa grai in su cumandu sudo

CVE at sinnalau una debilesa grai meda in su cumandu sudo, su chi permitit de giai àterus cumandus comenti super-impitadori in sistemas GNU/Linux che Debian o Ubuntu. S'arriscu est mannu pruschetotu po is serbidoris Linux chi impreant su cumandu, poita ca abastat un'acessu simpri a su sistema po ponni in òpera un'atacu sfrutendi custa debilesa e pigai su controllu de s'elaboradori, comenti podeus biri in su vìdeu.

Est arribau su corretori ortogràficu sardu po Firefox

Impreu de su ditzionàriu. Gràtzias a Luca po sa màgini.

Po incumentzai, unu bellu annu nou a totus! S'annu inghitzat cun una noa bella. Su CROS (Curretore regionale
ortogràficu sardu), giai a disponimentu in lìnia e po OpenOffice/LibreOffice, gràtzias a su traballu de Sardware oi si podit impreai puru in Firefox comenti ditzionàriu po s'averìguu ortogràficu. Podit essi installau scarrighendi-ddu innoi.

Etichette