Is noas de Ubuntu 23.04

Is noas de Ubuntu 23.04

Màgini de Canonical

Custu mesi ddoi at una pariga de noas de interessu in contu de Ubuntu, sa distributzioni de Linux prus famada po s'impreu domèsticu. Pagus diis a oi ant publicau sa versioni 23.04 "Lunar Lobster" (Aligusta Lunare) e est acabendi su suportu de sa 18.04 LTS (versioni a suportu longu). Eus a biri poita custu est de importu.

Is noas de sa versioni 23.04 funt:

  • Autenticatzioni cun Microsoft Azure
    Cun custa funtzioni, impitadoris de Microsoft 365 ant a podi autenticai Ubuntu Desktop cun is pròpius credentzialis chi impreant giai. Est unu sinnali de comenti is mundus de Linux e Windows s'acostint sèmpiri de prus, acabendi cun una gherra de sistemas chi est durada po dexinas de annus. Àteru sinnali de custa distensioni est su Linux Subsystem de Windows.
  • Mellus flussu de traballu po su svilupu de aplicatzionis multi-prataforma
    Gràtzias a s'impreu de QEMU (manìgiu de màchinas virtualis), Docker (manìgiu de cuntenidoris de sistema) e LXD (manìgiu de ambas cosas) fait a svilupai sa pròpiu aplicatzioni po ambientis diferentis.
  • Mellus cuntrollu de snap
    Snap est unu manigiadori de pachetus chi s'agiungit a s'apt-get chi connosceus de diora meda. Permitit de installai unu programa cun totu is dipendèntzias suas (librerias de programa) in un'ambienti separau de su de is àterus programas, amanniendi sa seguresa e permitendi sa coesistèntzia de versionis diferentis de su pròpiu programa o sa pròpiu libreria. Cun Ubuntu 23.04 s'impitadori tenit prus sceberus po manigiai s'annoamentu de is programas.
  • GNOME 44
    GNOME est s'ambienti de scrivania predefiniu de Ubuntu. S'ùrtima versioni sua includit amelloramentus de s'usabilidadi.
  • Steam
    Sa prataforma famada de giogu est bessida de sa versioni beta e lòmpia a sa stabilidadi. Est unu progressu de interessu, sendi chi genti meda no est mai bòfia passai a Linux po su fatu chi esistint pagus giogus e Wine no est mai lòmpiu a unu livellu de atòliu e cumpatibilidadi bastanti bonu po is giogus prus rexentis.
  • Programa nou de installatzioni, unificau po sa versioni desktop e server

Po cantu pertocat sa 18.04, sa noa est chi a fini de maju spàciat su suportu. Si tratat de una versioni populari meda, ancora impreada in sistemas medas. Est fintzas s'ùrtima versioni LTS, e s'ùrtima de Ubuntu ancora a disponimentu, cun suportu a sistemas a 32 bit. Is impreadoris de custa prataforma depint duncas nai adiosu a Ubuntu si bolint impreai programera in dii. Fait a sighi a annoai su sistema finas a su 2028 cun un'iscritzioni a Ubuntu Pro, ma sceti po is prataformas x86-64 e arm64.

Sa màgini de s'artìculu est de Canonical

Etichette

Cumenta