Is noas de Ubuntu 23.04

Custu mese ddoe at una pariga de noas de interessu in contu de Ubuntu, sa distributzione de Linux prus famada pro s'impreu domèsticu. Pagas dies a oe ant publicadu sa versione 23.04 "Lunar Lobster" (Aligusta Lunare) e est acabende su suportu de sa 18.04 LTS (versione a suportu longu). Amus a bìdere pro ite custu est de importu.

Is noas de sa versione 23.04 funt:

• Autenticatzione cun Microsoft Azure
  Cun custa funtzione, impitadores de Microsoft 365 ant a pòdere autenticare Ubuntu Desktop cun is pròpias credentziales chi impreant giai. Est unu sinnale de comente is mundos de Linux e Windows s'acostent semper de prus, acabbende cun una gherra de sistemas chi est durada pro deghinas de annos. Àteru sinnale de custa distensione est su Linux Subsystem de Windows.
• Mègius flussu de traballu pro s'isvilupu de aplicatziones multi-prataforma
  Gràtzias a s'impreu de QEMU (manìgiu de màchinas virtuales), Docker (manìgiu de cuntenidores de sistema) e LXD (manìgiu de ambas cosas) faghet a isvilupare sa pròpiu aplicatzione pro ambientes diferentes.
• Mègius controllu de snap
  Snap est unu manigiadore de pachetes chi s'agiunghet a s'apt-get chi connoschimus dae diora meda. Permitit de installare unu programma cun totu is dipendèntzias suas (librerias de programma) in un'ambiente separadu de su de is àteros programmas, ammanniende sa seguresa e permitende sa coesistèntzia de versiones diferentes de su pròpiu programma o sa pròpiu libreria. Cun Ubuntu 23.04 s'impitadore tenet prus seberos pro manigiare s'annoamentu de is programmas.
• GNOME 44
  GNOME est s'ambiente de iscrivania predefinidu de Ubuntu. S'ùrtima versione sua includet megioramentos de s'usabilidade.
• Steam
  Sa prataforma famada de giogu est essida dae sa versione beta e lòmpida a sa stabilidade. Est unu progressu de interessu, sende chi gente meda no est mai bòlfida passare a Linux pro su fatu chi esistint pagos giogos e Wine no est mai lòmpidu a unu livellu de atòliu e cumpatibilidade bastante bonu pro is giogos prus reghentes.
• Programma nou de installatzione, unificadu pro sa versione desktop e server

Pro cantu pertocat sa 18.04, sa noa est chi a fine de maju ispatzat su suportu. Si tratat de una versione populare meda, ancora impreada in sistemas medas. Est fintzas s'ùrtima versione LTS, e s'ùrtima de Ubuntu ancora a disponimentu, cun suportu a sistemas a 32 bit. Is impreadores de custa prataforma depent duncas nàrrere adiosu a Ubuntu si bolent impreare programmera in die. Faghet a sighire a annoare su sistema finas a su 2028 cun un'iscritzione a Ubuntu Pro, ma isceti pro is prataformas x86-64 e arm64.

S'immàgine de s'artìculu est de Canonical