Est arribau su corretori ortogràficu sardu po Firefox

Po incumentzai, unu bellu annu nou a totus! S'annu inghitzat cun una noa bella. Su CROS (Curretore regionale
ortogràficu sardu), giai a disponimentu in lìnia e po OpenOffice/LibreOffice, gràtzias a su traballu de Sardware oi si podit impreai puru in Firefox comenti ditzionàriu po s'averìguu ortogràficu. Podit essi installau scarrighendi-ddu innoi.

Custu trastu nosi donat un'agiudu mannu po sa scritura in lìngua sarda, fadendi-si arresparmiai su tempus de fai còpia-ataca de su testu in su situ de su CROS.

Su ditzionàriu sighit sa norma ortogràfica de sa Regioni Autònoma de Sardigna, sa Limba Sarda Comuna, duncas at a sinnalai comenti faddina ortogràfica s'impreu de unus cantu fueddus scritus in àteras variedadis. Custu no dipendit de sa voluntadi de Sardware: a dolu mannu, su CROS po is variantis no est a disponimentu po su scarrigamentu. Abarrat sa possibilidadi de agiungi àterus fueddus a su ditzionàriu fadendi clic cun su butoni de manca de su sòrixi asuba a is fueddus sinnalaus.

S'ùnicu àteu ditzionàriu a disponimentu est su chi sighit sa proposta ortogràfica Grafia Sarda Comuna, ma a dolu mannu no dd'annoant de diora e no fait prus a dd'installai.