Adiosu ICQ: si-nc'andat un'incueddu de stòria

Ddoi fiat unu tempus innui no esistiat Whatsapp, no esistiat Telegram e no esistiat nimancu Windows Live (MSN) Messenger. Fiat su 1996 e nasciat unu servìtziu chi ddi narànt ICQ, una sigla chi no bolit nai nudda, ma sonat che "I seek you" (ti circu). Comenti su ligidori at giai cumprèndiu, si tratat de unu programa de messageria, ajaju de is chi impreaus nosu me is telefoneddus nostus.

ICQ est stètiu famau meda, mancai custu tipu de aplicatzioni si siat spainada meda prus tradu de sa nàscida sua, e portàt unus cantu piessìnnius chi oi agataus a fitianu ma a cussu tempus fiant cosa noa. Po esempru, teniat sa possibilidadi de lassai unu messàgiu a un'impitadori chi no fiat in lìnia, teniat is emoticon e sa possibilidadi de publicai cuntènnius comenti s'est fatu prus tradu cun is diàrius (blog) e arretzas sotzialis.

In su 2001 is impitadoris de ICQ fiant prus de 100 millionis e est arribau finas a is telefoneddus de oi in forma de app, finas a s'annùntziu de su propietàriu de sa prataforma, VKontakte, de ddu bolli serrai su 26 de làmpadas de ocannu. In beridadi, ICQ no fiat prus a disponimentu me is butegas de Android e iOS, a fai cumprendi chi oramai su tempus suu fiat passau, ma de seguru sa noa at a lassai amargaus a is impitadoris bastanti mannus de dd'ai connotu me is primus annus de spainadura de Internet. Giai in su 2015 eus nau adiosu a MSN, in su 2017 a AOL e in su 2018 a Yahoo! Messenger. De cuss'època forsis abarrat sceti s'arretza IRC, chi tenit su bantàgiu de impreai unu protocollu abertu e duncas no dipendit de un'asienda sceti.