Adiosu ICQ: si nche andat unu biculeddu de istòria

Ddoe fiat unu tempus in ue no esistiat Whatsapp, no esistiat Telegram e no esistiat nen mancu Windows Live (MSN) Messenger. Fiat su 1996 e naschiat unu servìtziu chi ddi naraiant ICQ, una sigla chi non bolet nàrrere nudda, ma sonat che "I seek you" (ti chirco). Comente su leghidore at giai cumprèndidu, si tratat de unu programma de messageria, giaju de is chi impreamus nois me is telefoneddos nostros.

ICQ est istadu famadu meda, mancari custu tipu de aplicatzione si siat ispainada meda prus a tardu de sa nàschida sua, e portaiat unos cantu piessìnnios chi oe agatamus a fitianu ma a cussu tempus fiant cosa noa. Pro esempru, teniat sa possibilidade de lassare unu messàgiu a un'impitadore chi non fiat in lìnia, teniat is emoticon e sa possibilidade de publicare cuntènnidos comente s'est fatu prus tardu cun is diàrios (blog) e retzas sotziales.

In su 2001 is impitadores de ICQ fiant prus de 100 milliones e est arribadu finas a is telefoneddos de oe in forma de app, finas a s'annùntziu de su propietàriu de sa prataforma, VKontakte, de ddu bòlere serrare su 26 de làmpadas de ocannu. In beridade, ICQ non fiat prus a disponimentu me is butegas de Android e iOS, a fàghere cumprèndere chi oramai su tempus suo fiat passadu, ma de seguru sa noa at a lassare amargados a is impitadores bastante mannos de dd'àere connotu me is primos annos de ispainadura de Internet. Giai in su 2015 amus naradu adiosu a MSN, in su 2017 a AOL e in su 2018 a Yahoo! Messenger. De cussa època forsis abarrat isceti sa retza IRC, chi tenet su bantàgiu de impreare unu protocollu abertu e duncas non dipendet dae un'azienda isceti.