Gennaxu 2023

No sciu si innoi calincunu s'arregordat de is cumputadoris Asus EEE PC. Si tratat de una sèrie de PC ultra-portàtilis (o Netbook) chi fiant famaus meda me is annus intra su 2007 e su 2012. A cussu tempus is portàtilis clàssicus fiant carus e grais. Is ultra-portàtilis fiant invecis piticheddus, lèbius e baratus. Oindii s'agatant ancora ma no tenint prus importu meda, giai chi is tauleddas (tablet) ant pigau su logu insoru comenti dispositivus po sa navigatzioni in Internet e àteras fainas simpris. Comentisisiat, deu ndi tèngiu ancora unu e dònnia tanti mi fait prexeri a dd'impreai, duncas circu sèmpiri de ddu lassai lìmpiu e annoau.

A incumentzai de is 7:00 de su 23 de gennaxu is impitadoris de Libero e Virgilio no podint impreai is casellas de posta eletrònica insoru. In su momentu chi seu scriendi cust'artìculu est su merì de su 25 e ancora no funtzionant. Est sa bàscia de servìtziu prus longa de sèmpiri po is duas prataformas. In prus, a incumentzai de is 7:00 de oi, fintzas Microsoft Teams at tentu sinnalatzionis meda de funtzionamentu malu. Andaus a castiai ita megat de acuntessi.

Pagu innantis de Paschixedda de su 2022 est stètia publicada sa de cuàturu versionis beta de Haiku, su sistema operativu lìberu cumpatìbili cun BeOS. Sa versioni noa portat amelloramentus medas de stabilidadi e unu mellus suportu software e hardware. In custu artìculu andaus a biri is noas e is arresurtaus de is proas mias.

S'11 de custu mesi, gennaxu 2023, su tràficu aèreu me is Stadus Aunius est abarrau frimu po unus 90 minutus. S'arraxoni est stètia su blocu de su sistema de avisus a su personali de bòlidu (NOTAM, NOtice To AirMen). In s'incumentzu s'est pensau a un'atacu de hacker.

Dda descriiant comenti "sa Netflix de sa cultura italiana". Dd'at bòfia s'ex ministru Dario Franceschini in su peus momentu de sa pandemia de COVID-19, candu su guvernu iat decìdiu se inserrai is italianus in domu comenti medida de cuntenimentu de sa maladia - su pròpiu perìodu innui est nàsciu fintzas custu diàriu. Sa prataforma permitit de castiai cuntènnius de cultura paghendi unu billetu che in unu tzìnema o museu, cun duas modalidadis: nolègiu chi permitit de castiai unu cuntènniu po unu tempus limitau, o compròngiu chi ddu permitit totu is bortas chi si bolit, mancai su fueddu siat impròpiu. Ddoi funt a disponimentu pellìculas de registas mannus, bìsitas virtualis a logus de arti, cuntzertus e àteru ancora. Su problema: su progetu no at atirau s'interessu de su pùblicu e duncas is intradas funt stètias limitadas.

Windows 7 est stètia una versioni de su sistema Microsoft stimada meda de is impitadoris, chi dd'ant biu comenti su sucessori perfetu de Windows XP apustis de su fallimentu de Windows Vista, publicau in pressi e tropu grai po sa parti manna de is computeras chi esistiant insandus. Sa versioni 8 no est stètia amada che sa 7, ma mancu odiada che Vista. Est stètia una versioni de passàgiu in unu perìodu innui Microsoft circàt de si pigai una parti de su mercau in su mundu de is sistemas po dispositivus mòbilis. Teniat duncas su bantaxu de essi lèbiu e lestu in s'aviu. Comentisisiat, in su perìodu de Windows 7 e 8 is cumputadoris bèndius funt stètius medas, duncas s'11% de is elaboradoris acapiaus a s'arretza impreant ancora sa versioni 7 e un'àteru 3,59% impreant is versionis 8 e 8.1. Totu custus impitadoris ant a fai beni a circai un'alternativa, ca is sistemas insoru no ant a arrici prus annoamentus.