Ghennàrgiu 2023

No isco si inoghe calicunu si regordat de is cumputadores Asus EEE PC. Si tratat de una sèrie de PC ultra-portàtiles (o Netbook) chi fiant famados meda me is annos intre su 2007 e su 2012. A cussu tempus is portàtiles clàssicos fiant caros e graes. Is ultra-portàtiles fiant imbetzes piticheddos, lèbios e baratos. Oe in die s'agatant ancora ma non tenent prus importu meda, giai chi is tauleddas (tablet) ant pigadu su logu issoro comente dispositivos pro sa navigatzione in Internet e àteras fainas simpres. Comente si siat, deo nde tèngio ancora unu e ònnia tanti mi faghere praghere a dd'impreare, duncas chircu semper de ddu lassare lìmpiu e annoadu.

A incumentzare de is 7:00 de su 23 de ghennàrgiu is impitadores de Libero e Virgilio non podent impreare is casellas de posta eletrònica issoro. In su momentu chi so iscriende custu artìculu est su merie de su 25 e ancora non funtzionant. Est sa bàscia de servìtziu prus longa de semper pro is duas prataformas. In prus, a incumentzare de is 7:00 de oe, fintzas Microsoft Teams at tentu sinnalatziones meda de funtzionamentu malu. Andamus a castiare ite amegat de acontèssere.

Pagu in antis de Paschighedda de su 2022 est istada publicada sa de bator versiones beta de Haiku, su sistema operativu lìberu cumpatìbile cun BeOS. Sa versione noa portat megioramentos medas de istabilidade e unu mègius suportu software e hardware. In custu artìculu andamus a bìdere is noas e is resurtados de is proas mias.

S'11 de custu mese, ghennàrgiu 2023, su tràficu aèreu me is Istados Unidos est abarradu firmu pro unos 90 minutos. Sa resone est istada su blocu de su sistema de avisos a su personale de bòlidu (NOTAM, NOtice To AirMen). In s'incumentzu s'est pensadu a un'atacu de hacker.

Dda descriiant comente "sa Netflix de sa cultura italiana". Dd'at bòlida s'ex ministru Dario Franceschini in su peus momentu de sa pandemia de COVID-19, cando su guvernu aiat detzìdidu se inserrare is italianos in domo comente medida de cuntenimentu de sa maladia - su pròpiu perìodu in ue est nàschidu fintzas custu diàriu. Sa prataforma permitit de castiare cuntènnidos de cultura paghende unu billete che in unu tzìnema o museu, cun duas modalidades: nolègiu chi permitit de castiare unu cuntènnidu pro unu tempus limitadu, o compròngiu chi ddu permitit totu is bortas chi si bolet, mancari su faeddu siat impròpiu. Ddoe sunt a disponimentu pellìculas de registas mannos, bìsitas virtuales a logos de arte, cuntzertos e àteru ancora. Su problema: su progetu no at atiradu s'interessu de su pùblicu e duncas is intradas sunt istadas limitadas.

Windows 7 est istada una versione de su sistema Microsoft istimada meda dae is impitadores, chi dd'ant bidu comente su sutzessore perfetu de Windows XP a pustis de su fallimentu de Windows Vista, publicadu in presse e tropu grae pro sa parte manna de is computeras chi esistiant insandus. Sa versione 8 no est istada amada che sa 7, ma mancu odiada che Vista. Est istada una versione de passàgiu in unu perìodu in ue Microsoft chircaiat de si pigare una parte de su mercadu in su mundu de is sistemas pro dispositivos mòbiles. Teniat duncas su bantàgiu de èssere lèbiu e lestru in s'aviu. Comente si siat, in su perìodu de Windows 7 e 8 is cumputadores bèndidos sunt istados medas, duncas s'11% de is elaboradores acapiados a sa retza impreant ancora sa versione 7 e un'àteru 3,59% impreant is versiones 8 e 8.1. Totu custos impitadores ant a fàghere bene a chircare un'alternativa, ca is sistemas issoro no ant a retzire prus annoamentos.