Bòlidos blocados me is USA pro neghe de un'archìviu difetosu

S'11 de custu mese, ghennàrgiu 2023, su tràficu aèreu me is Istados Unidos est abarradu firmu pro unos 90 minutos. Sa resone est istada su blocu de su sistema de avisos a su personale de bòlidu (NOTAM, NOtice To AirMen). In s'incumentzu s'est pensadu a un'atacu de hacker.

Sende chi s'ùrtima borta chi s'est presentadu unu blocu de aici fiat s'11 de cabudanni de su 2001 in s'ìnteri de s'atacu a su World Trade Center, s'orròliu est istadu mannu. Difatis a pustis de su riaviu de su sistema, non fiat cunsideradu ancora bastante seguru pro torrare a fàghere partire is aparèchios.

S'imbìstigu at ammusrtadu chi s'orìgine de su problema fiat meda prus simpre de su chi pariat: s'archìviu de una base de datos difetosu. Su NOTAM est unu sistema ativu dae su 1947 e parte de s'infrastrutura sua est ancora betza. Est unu problema bastante fitianu in sistemas crìticos in ue is tècnicos timent chi su protzessu de annoamentu potzat imbucare vulnerabilidades o andare male e blocare su servìtziu. Custu paret èssere una parte de su problema, difatis s'Amministratzione de s'Aviatzione Federale est traballende pro chircare de mantènnere su sistema annoadu.