Bòlidus blocaus me is USA po nexi de un'archìviu difetosu

S'11 de custu mesi, gennaxu 2023, su tràficu aèreu me is Stadus Aunius est abarrau frimu po unus 90 minutus. S'arraxoni est stètia su blocu de su sistema de avisus a su personali de bòlidu (NOTAM, NOtice To AirMen). In s'incumentzu s'est pensau a un'atacu de hacker.

Sendi chi s'ùrtima borta chi s'est presentau unu blocu de aici fiat s'11 de cabudanni de su 2001 in s'interis de s'atacu a su World Trade Center, s'orròliu est stètiu mannu. Difatis apustis de su riaviu de su sistema, no fiat cunsiderau ancora bastanti seguru po torrai a fai partiri is aparèchius.

S'imbìstigu at amostau chi s'orìgini de su problema fiat meda prus simpri de su chi pariat: s'archìviu de una basi de datus difetosu. Su NOTAM est unu sistema ativu de su 1947 e parti de s'infrastrutura sua est ancora bècia. Est unu problema bastanti fitianu in sistemas crìticus innui is tènnicus timint chi su protzessu de annoamentu potzat imbucai vulnerabilidadis o andai mali e blocai su servìtziu. Custu parit essi una parti de su problema, difatis s'Aministratzioni de s'Aviatzioni Federali est traballendi po circai de mantenni su sistema annoau.