Libero, Virgilio e Microsoft Teams "a suta". Ite acontesset?
A incumentzare de is 7:00 de su 23 de ghennàrgiu is impitadores de Libero e Virgilio non podent impreare is casellas de posta eletrònica issoro. In su momentu chi so iscriende custu artìculu est su merie de su 25 e ancora non funtzionant. Est sa bàscia de servìtziu prus longa de semper pro is duas prataformas. In prus, a incumentzare de is 7:00 de oe, fintzas Microsoft Teams at tentu sinnalatziones meda de funtzionamentu malu. Andamus a castiare ite amegat de acontèssere.
Libero fiat su portale de Infostrada, unu frunidore de servìtzios Internet famadu meda dae sa metade de is annos 90 a sa metade de is 2010. Virgilio frunit servìtzios medas e fiat famadu meda me is primos annos 2000 pro su motore de chirca suo (cambiadu a pustis cun Bing, su de Microsoft).
Mancari oe in die is servìtzios non siant prus famados che una borta, ambos tenent casellas de posta medas ancora ativas. In totu, si chistionat de noe milliones de casellas chi non sunt funtzionende.
Sa prima cosa chi is impitadores ant pensadu, biende chi su servìtziu no est a disponimentu pro unu tempus longu de aici, est istadu un'atacu informàticu a sa prataforma. Calicunu forsis s'est regordadu chi Liberu dd'aiant giai atacadu, furende-ddi is craes de is impitadores. ItaliaOnline, propietària de is duas prataformas, at negadu s'ipòtesi de s'atacu, ponende unu comunicadu me is pàginas de sa webmail. In sa comunicatzione sa sotziedade s'iscusat pro is problemas e contat chi custos si depent a un'annoamentu de s'infrastrutura de retza chi no est andadu bene, promitende de risòlvere totu in 24/48 oras.
Pro cantu pertocat Teams, su problema fiat fintzas de àteros produtos cloud de Microsoft 365 comente Outlook Online e OneDrive for Business. Bolet nàrrere chi su problema est prus che totu de is impitadores professionales. Aziendas medas impreant Teams comente programma de messageria intre collegas e pro is addòbios de traballu. Microsoft no at ghetadu comunicatziones pro ispricare is resones de s'acuntessimentu, ma at decraradu chi su problema fiat risoltu a is 15:30 de oi. S'est tratadu duncas de unu disservìtziu meda prus limitadu de su de ItaliaOnline.
Cummenta