Apagón: 12 oras in Spànnia chena luxi

Fiant is 12:40, prus o mancu, candu apu intèndiu su "bip bip bip" de su grupu de continuidadi chi mi sinnalàt chi si-nci fiat andada sa luxi.
Eventus che custu no funt stròlicus in domu mia, ca totu est elètricu, incumintzendi de su buddidori de s'àcua finas a sa coxina, duncas a bortas su furru ndi fait sartai su sarvavida, ma custa borta fiat diferenti.

Averiguau chi sa currenti no arribàt a su contadori, apu abertu sa genna e unu de is bixinus m'at nau chi totu su bixinau fiat chena luxi. De un'averiguu lestu, est bessiu a pilu chi totu sa Spànnia e su Portugallu fiant in sa pròpiu situatzioni. In s'interis apu sighiu a traballai creendi chi totu iat a essi torrau a sa normalidadi in pagu tempus, ma a is 15:00 fintzas is telèfonus ant incumentzau a no pigai prus su sinnali e a is 16:00 sa bateria de su portàtili m'at abandonau.

A cussu puntu fiat craru chi sa farta de luxi iat a essi durada ancora oras e oras, ca una borta studau totu, is cumpangias elètricas depint torrai a fruniri sa currenti a pagu a pagu po no fai dannu a strumentus e lìnias. Ma nemus s'est fatu assustrai de su chi fiat acuntessendi: candu custas cosas sucedint me is Stadus Aunius ddoi funt scenas de pànicu, assachìngiu de is supermercaus, etc, mentris innoi ant bintu s'òrdini e sa ratzionalidadi. Su peus chi est acuntèssiu est chi calincunu est abarrau blocau in calincunu pesadori, ma sa politzia est intervènnia luegus a ddus liberai. Ddoi funt stètius problemas de tràficu po nexi de is trenus firmus e de is semàforus studaus, ma no ddoi funt noas de acuntessimentus grais.

A pagu a pagu is butegas ant serrau is gennas, a foras de is prus piticas chi ant sighiu sa faina e, forsis, nd'ant puru guadangiau ca cun sa scusa chi is stadeas funt elètricas fiant pesendi sa fruta e sa birdura a grussu. Sa genti s'atopàt a foras po arraxonai de custu e de cuss'àteru comenti no si biit prus meda e is piciocheddus, assumancu custa borta, no teniant is ogus atacaus a su schermu de su telefoneddu. Sa luxi est torrada prus o mancu a mesunoti .

No si sciit ancora ita siat acuntèssiu. Ariseu si fueddàt de atacu informàticu, opuru de unu fogu acanta de is lìnias in sa làcana cun sa Frantza; oi si fueddat de un'acuntessimentu metereològicu raru, ma nemus nd'at spricau su naturali. Abarrat puru sa possibilidadi chi si siat tratau de una faddina umana, comenti in su 2006, candu sa sconnessioni de una lìnia in Germània at creau un'efetu a spèndula, lassendi parti de s'Europa a su scuru. In s'interis si ndi pesant teorias cospirativas: calincunu si domandat si custa cosa si ligat in calincuna manera a s'arracumandatzioni de s'Europa a tenni in domu riservas de cosa de papai e àcua po tres diis, fueddendi de proa generali, ma is prus otimistas ant a nai chi sa genti at amostau una resilièntzia bona.

S'ocasioni est bona po arraxonai de cantu dipendeus de s'eletricidadi e Internet: ariseu, chini totu no portàt dinai e documentus fìsicus fiat de seguru prus in dificultadi de chini no portat totu in forma digitali e, si nci pensaus, po is butegas iat a essi bastada una pesa clàssica, una pinna e unu blocu de retzidas fiscalis po sighi a traballai puru chena luxi, mancai prus abellu. Donniunu ndi podit bogai sa letzioni chi preferit.