Apagón: 12 oras in Ispànnia chene lughe

Fiant is 12:40, prus o mancu, cando apo intèndidu su "bip bip bip" de su grupu de continuidade chi mi sinnalaiat chi si nche fiat andada sa lughe.
Eventos che custu non sunt istròlicos in domo mia, ca totu est elètricu, incumintzende dae su buddidore de s'abba finas a sa coghina, duncas a bortas su furru nde faghet sartare su sarvavida, ma custa borta fiat diferente.

Averiguadu chi sa currente no arribaiat a su contadore, apo abertu sa ghenna e unu de is bighinos m'at nadu chi totu su bighinadu fiat chene lughe. De un'averìguu lestru, est essidu a pìgiu chi totu s'Ispànnia e su Portugallu fiant in sa pròpiu situatzione. In s'ìnteri apo sighidu a traballare creende chi totu diat a èssere torradu a sa normalidade in pagu tempus, ma a is 15:00 fintzas is telèfonos ant incumentzadu a non pigare prus su sinnale e a is 16:00 sa bateria de su portàtile m'at abbandonadu.

A cussu puntu fiat craru chi sa farta de lughe diat a èssere durada ancora oras e oras, ca una borta istudadu totu, is cumpangias elètricas depent torrare a frunire sa currente a pagu a pagu pro non fàghere dannu a istrumentos e lìnias. Ma nemos s'est fatu assustare dae su chi fiat acontessende: cando custas cosas sutzedent me is Istados Unidos ddoe sunt iscenas de pànicu, assachìngiu de is supermercados, etc, mentres inoghe ant bintu s'òrdine e sa ratzionalidade. Su peus chi est acontèssidu est chi calicunu est abarradu blocadu in calicunu pesadore, ma sa politzia est intervènnida luego a ddos liberare. Ddoe sunt istados problemas de tràficu pro neghe de is trenos firmos e de is semàforos istudados, ma non ddoe sunt noas de acuntessimentos graes.

A pagu a pagu is butegas ant serradu is ghennas, a foras de is prus piticas chi ant sighidu sa faina e, forsis, nd'ant puru balangiadu ca cun s'iscusa chi is istadeas sunt elètricas fiant pesende sa fruta e sa birdura a grussu. Sa gente s'atopaiat a foras pro arresonare de custu e de cuss'àteru comente non si bidet prus meda e is pitzocheddos, a su mancu custa borta, non teniant is ogros atacados a s'ischermu de su telefoneddu. Sa lughe est torrada prus o mancu a mesunote.

Non s'ischit ancora ite siat acontèssidu. Erisero si faeddaiat de atacu informàticu, opuru de unu fogu acanta de is lìnias in sa làcana cun sa Frantza; oe si faeddat de un'acuntessimentu metereològicu raru, ma nemos nd'at ispricadu su naturale. Abarrat puru sa possibilidade chi si siat tratadu de una faddina umana, comente in su 2006, cando s'isconnessione de una lìnia in Germània at creadu un'efetu a ispèndula, lassende parte de s'Europa a s'iscuru. In s'ìnteri si nde pesant teorias cospirativas: calicunu si domandat si custa cosa si ligat in calicuna manera a sa racumandatzione de s'Europa a tènnere in domo riservas de cosa de papare e abba pro tres dies, faeddende de proa generale, ma is prus otimistas ant a nàrrere chi sa gente at ammustradu una resilièntzia bona.

S'ocasione est bona pro arresonare de canto dipendimus dae s'eletritzidade e Internet: erisero, chie totu non portaiat dinari e documentos fìsicos fiat de seguru prus in dificultade de chie non portat totu in forma digitale e, si nche pensamus, pro is butegas diat a èssere bastada una pesa clàssica, una pinna e unu blocu de retzidas fiscales pro sighire a traballare puru chene lughe, mancari prus a bellu. Onniunu nde podet bogare sa letzione chi preferit.