Una pariga de diis a oi s'apu contau de is narìngius chi Microsoft fiat giai po annuntziai s'arribu de Windows 11. Custus contus fiant berus. Difatis, imoi scieus chi Windows 11 at a bessiri a s'acabu de su 2011/incumentzu de 2022. Andaus a biri is prus noas de importu.

S'est chistionendi meda me is ùrtimus diis de s'annùntziu de una versioni noa de Windows chi Microsoft iat a depi fai su 24 de làmpadas. No si sciit meda e segundu unus cantu narìngius no ddoi at essi una versioni noa, ma un'annoamentu mannu de Windows 10, chi dd'ant a nai Windows 10 Sun Valley, sighendi su stili de Mac OS X po is nòminis de sistema e pighendi elementus de un'àtera versioni cancellada de Windows, sa 10X. Comentisisiat, The Verge at publicau un'artìculu chi amostat unas cantu màginis de Windows 11 chi parint cunfirmendi chi Microsoft siat acanta de dd'annuntziai.

Po is chi no ddu connoscint, WSL (Windows Subsystem for Linux) est unu suta-sistema chi permitit de esecutai aplicatzionis po Linux in unu sistema Windows 10. Installendi-ddu est possìbili a impreai custus programas comenti chi fessint trastus po sa lìnia de cumandu chena depi impreai una màchina virtuali comenti VirtualBox o VMWare. A incumentzai de Windows 10 Build 21364 fintzas is programas cun interfaci gràfica ant a essi suportaus.

Cantu bortas circhendi càncua cosa in unu motori de circa in su Web eus agatau sa pròpiu pregonta in Yahoo Answers? Custu si donàt assumancu su sentidu de no essi is ùnicus tontus a tenni cussa duda. Is arrespustas de sa comunidadi fiant a fitianu tontidadis, ma càncua borta giai s'ant agiudau.

Sa Banca de Inghilterra at publicau su progetu po su billetu nou de banca de 50£, chi at a tenni sa màgini de Alan Turing, unu matemàticu de importu mannu e unu de is babus de s'informàtica. Su personàgiu dd'ant sceberau in su 2019 po arregordai su traballu suu me is campus de sa matemàtica e s'informàtica e po su contributu suu in sa vitòria in sa Segunda Gherra Mundiali po ai decifrau su còdixi Enigma de sa Germània.

"S'aconnoscimentu faciali podit e at a essi impreau contras a donniunu de nosu de is guvernus e is multinatzionalis" - Custa est sa presentada po sa petitzioni ofitziali a sa Cumissioni Europea "Torra a ti pigai sa faci" po su bandu de sa guardiania biomètrica e duncas contras a sa possibilidadi de essi connotu de sistemas automàticus aundisisiat s'agataus.

In su noti intra su 9 e su 10 de martzu me in Strasburgo su fogu at fatu dannu a unu centru de datus de unu de is prus frunidoris mannus de servìtzius de informàtica in sa nui (cloud computing). S'efetu de custu disacatu est chi unus cantu servìtzius e giassus web no funt a disponimentu in custas ùrtimas diis. Custu poita ca su fogu at spèrdiu una parti de is elaboradoris e is tènnicus ant dèpiu studai totu is àterus.

Un'artìculu in su blog de Kaspersky nosi fait sciri chi cun sa pandemia de COVID-19 est incumentzau unu mercau cuau in su web scuru (dark web) innui si bendint artìculus de protetzioni, comenti is mascareddas, e fintzas su vacinu, cun prètzius chi andant de 250$ a 1200$, o certificaus farsus de vacinu po is chi bolint biagiai chena ddu fai.

Eus giai biu comenti impreai su Messenger de Facebook in Linux gràtzias a un'estensioni de Pidgin. A dolu mannu, custa solutzioni nos'òbligat a renuntziai a sa parti manna de is funtzionalidadis de Facebook, comenti s'imbiu de fotografias, vìdeus, archìvius e messàgius de boxi, poita ca s'estensioni po Pidgin no ndi frunit suportu po imoi. Andaus a biri duncas àteras 3 solutzionis basadas apitzus de s'aplicatzioni Web ofitziali de Facebook.