Est inghitzau s'ùrtimu annu de Internet Explorer

Est stètiu po meda su navigadori de impreu prus mannu in su mundu, dd'eus odiau meda comenti impitadoris e comenti svilupadoris web. Dd'eus mudau cun Firefox e Chrome arregordendi-ddu comenti esempru de navigadori coaxu, pagu seguru e pagu arrespetosu de is standard. Fiat craru de diora chi Internet Explorer fiat morrendi e imoi est ofitziali: sa versioni 11, publicada in su 2013 at a essi s'ùrtima. S'amparu acabat su 17 austu de su 2021.

Microsoft at publicau su pranu de s'acabu de is progetus de IE e de Edge Legacy, versioni de mesu intra su navigadori bèciu e su nou, Edge, chi est arrennèsciu a torrai a gadangiai cancu impreadori, mancai no siat stimau de sa parti manna de is internàutas, ca sa majoria sighit a impreai Google Chrome.

Giai ocannu, su 30 de donniasantu, Microsoft Teams, sa prataforma professionali de Microsoft, no at a essi prus cumpatìbili cun Explorer. Su 9 de martzu de su 2021 eus a nai adiosu a Edge Legacy e eus acabai su caminu cun sa fini de Explorer su 17 austu 2021. Est sa fini de un'era. Si calincunu surrùngiat custu navigadori o ndi tenit abisòngiu po cancu motivu, podit impreai sa modalidadi Internet Explorer in Edge.