Gmail no funtzionat prus in s'ordinadori? Is solutzionis.

A incumentzai de unu mesi a oi, Gmail no permitit prus s'impreu cun aplicatzionis bècias e pagu seguras. Custu po circai de amanniai sa seguresa de is contus bostus. Sendi chi Google in custu momentu est su prus frunidori mannu de custu tipu de servìtziu, difatis, ddoi at genti meda cun intentzionis malas chi ddis iat a praxi a furai is datus de totu is clientis insoru. Custu est giai acuntèssiu prus de una borta cun àterus frunidoris. Calincunu, po esempru, at a arregordai candu genti meda at pèrdiu s'atzessu a sa posta de Libero e sa casella insoru at incumentzau a spraxi messàgius SPAM a totu is cuntatus sarvaus. S'efetu de cust'amànniu de seguresa est chi calincunu de nosu no arrannescit prus a ligi sa posta cun su programa chi at sèmpiri impreau. Andaus a biri cali funt is solutzionis.

1. Cambiai su mètodu de autenticatzioni.

Po impreai Gmail tocat amarolla a impreai sa genna 993 po IMAP e 995 si seis impreendi POP3. SSL/TLS depit essi ativu po sa seguresa e s'autenticatzioni bolit fata cun OAuth2. TLS o STARTTLS bolint impreaus fintzas po su serbidori in bessida (SMTP). Sa genna po TLS est 465 e po STARTTLS est 587.
Si su programa chi seis impreendi no suportat custas propiedadis andai a is puntus chi benint.

2. Annoai s'aplicatzioni

Impreai una versioni rexenti de s'aplicatzioni de posta, ca at a essi prus segura de una bècia. Si seis ancora impreendi Outlook Express o aplicatzionis de s'edadi de Windows XP est ora de dda cambiai. Deu si cunsillu Thunderbird, ca s'agiudat fintzas cun una cunfiguratzioni ghiada. Si boleis un'aplicatzioni totu-in-unu cun unu pagu prus de cosa de fai a manu, SeaMonkey podit essi unu sceberu bellu.

3. Versioni Web

Est una solutzioni chi no mi praxit meda, ca deu preferu a organizai sa posta cun unu programa installau in s'ordinadori e no a traessu de su navigadori, ma comenti forsis scieis Gmail fait a dd'impreai comenti aplicatzioni Web.

Arrannèscius seis? Faei-mi sciri cali solutzioni seis impreendi bosàterus.