Dda descriiant comente "sa Netflix de sa cultura italiana". Dd'at bòlida s'ex ministru Dario Franceschini in su peus momentu de sa pandemia de COVID-19, cando su guvernu aiat detzìdidu se inserrare is italianos in domo comente medida de cuntenimentu de sa maladia - su pròpiu perìodu in ue est nàschidu fintzas custu diàriu. Sa prataforma permitit de castiare cuntènnidos de cultura paghende unu billete che in unu tzìnema o museu, cun duas modalidades: nolègiu chi permitit de castiare unu cuntènnidu pro unu tempus limitadu, o compròngiu chi ddu permitit totu is bortas chi si bolet, mancari su faeddu siat impròpiu. Ddoe sunt a disponimentu pellìculas de registas mannos, bìsitas virtuales a logos de arte, cuntzertos e àteru ancora. Su problema: su progetu no at atiradu s'interessu de su pùblicu e duncas is intradas sunt istadas limitadas.

Windows 7 est istada una versione de su sistema Microsoft istimada meda dae is impitadores, chi dd'ant bidu comente su sutzessore perfetu de Windows XP a pustis de su fallimentu de Windows Vista, publicadu in presse e tropu grae pro sa parte manna de is computeras chi esistiant insandus. Sa versione 8 no est istada amada che sa 7, ma mancu odiada che Vista. Est istada una versione de passàgiu in unu perìodu in ue Microsoft chircaiat de si pigare una parte de su mercadu in su mundu de is sistemas pro dispositivos mòbiles. Teniat duncas su bantàgiu de èssere lèbiu e lestru in s'aviu. Comente si siat, in su perìodu de Windows 7 e 8 is cumputadores bèndidos sunt istados medas, duncas s'11% de is elaboradores acapiados a sa retza impreant ancora sa versione 7 e un'àteru 3,59% impreant is versiones 8 e 8.1. Totu custos impitadores ant a fàghere bene a chircare un'alternativa, ca is sistemas issoro no ant a retzire prus annoamentos.

Is chircadores de Avast, su produtore de unu de is prus antivirus famados de su mundu, ant publicadu un'articulu de interessu a pitzus de una tècnica impreada pro furare datos a aziendas de importu e de guvernu in Àsia. Sa cosa de interessu est chi su còdighe pro nde-ddos furare est cuadu in immàgines PNG che milliones de àteras chi s'agatant in Ìnternet.

Sa noa de sa dispidida de ùndighimigia traballadores de Facebook, Instagram e Whatsapp arribat a pagas dies dae s'annùntziu de sa dispidida de 3700 traballadores de Twitter. 14700 logos de traballu pèrdidos chi s'agiunghent a a is de Netflix, TikTok e àteras cumpangias chi òperant in servìtzios ìnternet. Ite amegat de acontèssere? Andamus a castiare prus acanta.

Amazon at presentadu una denùntzia contras unu sistema de retzensiduras positivas a insertziones in càmbiu de dinari o produtos gratis.

Forsis ais intèndidu chistionare de Mastodon me is ùrtimas dies, ca impitadores medas sunt moende a custa retza a pustis chi Elon Musk at comporadu Twitter. A medas difatis non praghet sa voluntade de Musk de furriare Twitter, una sotziedade pro atziones, a azienda privada in ue issu pigat totu is detzisiones. E una de custas detzisiones, sa de donare sa libertade cumpleta de espressione, chene moderatziones de cuntènnidos chi non siant a foras de lege, at assustadu a gente meda. Cale si siant is motivos, impitadores medas ant detzìdidu de serrare su profilu Twitter e passare a Mastodon. Mastodon no est unu progetu nou, ma medas no nd'ant mai intèndidu chistionare. Andamus a bìdere ite tenet de diferente.

Prus de 30 estensiones de Google Chrome, su navigadore web prus impreadu in su mundu, ant tentu prus de unu millione de iscarrigamentos. Ddoe at isceti unu problema: custas estensiones esecutant còdighe dannàrgiu in sa computera de s'impidatore.

Si torrat a chistionare de testimòngios (o cookies, connotos in sardu fintzas cun sa furriadura literària boboetos o pistocos). In cale si siat giassu in ue intramus bidimus s'informativa pro s'impreu issoro - una pràtica bastante infadosa, cunsideradu chi ddoe at mègius tècnicas pro sarvare datos in su navigadore de s'usuàriu. Sa lege europea narat chi a s'impitadore bolet oferta sa possibilidade de denegare su permissu de sarvare testimòngios, ma pagu tempus a immoe is giornales italianos ant incumentzadu una pràtica noa: o s'atzetant is testimòngios o si pagat s'abonamentu.

Una pariga de chidas a oe amus chistionadu de inteligèntzia artifitziale. Resuminende, un'inteligèntzia artifitziale no est àteru chi un'algoritmu chi adatat s'essida sua a su tipu de risposta chi nos abetamus dae unos cantos datos de intrada: in pràtica, semus chistionende de unu grupu de nùmeros e istrutziones in un'elaboradore. Su chi faghimus de custos nùmeros dipendet isceti dae nois. Duncas non depimus èssere assustados, ma chircare de impreare custas tecnologias pro càncua cosa de bonu. Custu tipu de elaboratzione, in màchinas chi sunt lòmpidas a potèntzias mannas de càrculu, permitit difatis de fàghere cosas chi una borta fiant possìbiles isceti me is pellìculas de fantasièntzia. Calincuna de custas cosas podent pàrrere una tontidade, àteras ant a pòdere lassare ispantados o assustados, àteras ancora podent fintzas agiudare su progressu de sa meighina e agiudare a illebiare is sufrimentos de is malàidos. Andamus a bìdere cancu esempru.

Si nde chistionat dae diora meda, ma a sa fine su Cussìgiu de s'Unione Europea at aprovadu unu formadu universale pro is càrriga-baterias de telefoneddos, tauleddas, computeras portàtiles e àteros dispositivos.