Adiosu a Cortana in iOS e Android

CortanaCortana, s'assistente vocale de Microsoft est arribbada in su 2014 in pari cun Windows Phone 8.1 ma, comente su sistema Microsoft pro telefoneddos, no est renèssidu a intrare in su coro de is impreadores e duncas Microsoft at detzìdidu de dda bogare dae is dispositivos iOS e Android a incumentzare dae su 2021. Dd'at annuntziadu sa Microsoft etotu in un'artìculu in su giassu suo.

Is noas de Google Chrome 84

Logo ChromeGoogle at publicadu sa versione 84 de su navigadore suo, Chrome. Sa publicatzione est arribada tardu, comente pro totu is versiones a incumentzare dae sa 81, pro more de su traballu chi est andende prus a bellu in custu tempus de pandèmia. Is noas, in pari cun sa curretzione normale de faddinas, tocant sa seguresa e s'agiunta de funtziones noas.

Facebook est chirchende de unire Messenger, Instagram e Whatsapp

App po messàgius
Figura de Thomas Ulrich de Pixabay

No fiat difìtzile de bisare chi Facebook boleret aunire a unu tzertu puntu totu is aplicatziones de messàgios suas in una isceti o a su mancu de fàghere a manera chi siat prus fàtzile a comunicare cun is impreadores de s'una o de s'àtera e dd'aiat fintas cunfirmadu Zuckerberg s'annu passadu. Unu programmadore at iscritu un'artìculu a pitzus de s'incumentzu de sa possibilidade de unire Messenger cun Instagram, mancari siat ancora isceti una proa tècnica chi podet èssere tirada in is meses chi benint.

Sighit sa batalla pro su domìniu .srd

.srdSa regorta de firmas pro su domìniu .srd est inghitzada giai dae diora meda e sighit cun s'agiudu de is sardos e de is amantiosos de sa Sardigna chi nche creent.
Su domìniu de primu livellu, ddu regordamus, est sa parte a pustis de s'ùrtimu puntu in s'indiritzu de unu situ. Bide sa letzione a pitzus de su Web pro prus informatziones.

Etichetas

S'app Immuni est unu fallimentu

App Covid

Sunt isceti 4 milliones is iscarrigamentos de s'app Immuni, su programma pro telefoneddos chi depiat agiudare a firmare s'isparghidura de s'impestu de COVID-19. Est unu nùmeru meda prus bàsciu de su 60% de sa populatzione chi fiat sa pertzentuale de segudare pro pòdere funtzionare bene. S'iscarrigamentu no est obligatòriu e in nisciunu casu ddu podet èssere pro more de sa costitutzione italiana e de is leges in contu de privatesa, ma su guvernu italianu isperat de cumbìnchere prus gente cun una publitzidade prus manna in is dies chi benint.

2020: s'ùrtimu annu de Adobe Flash Player

.Adobe nos informat chi su 31 de Idas 2020 at a acabbare de annoare e cumpartire su Flash Player, programma chi est istadu pro medas annos sa base de medas giassis Web, incluidu Youtube, ma chi a incumentzare de su 2015 at inghitzadu a èssere mudadu cun solutziones HTML5, prus lèbias, prus seguras e prus adatas a funtzionare in telefoneddos e àteros dispositivos mòbiles.

Etichetas