Chrome: atentzione a is estensiones malas

Prus de 30 estensiones de Google Chrome, su navigadore web prus impreadu in su mundu, ant tentu prus de unu millione de iscarrigamentos. Ddoe at isceti unu problema: custas estensiones esecutant còdighe dannàrgiu in sa computera de s'impidatore.

S'atacu funtzionat in custa manera: s'impitadore chircat vìdeos o materiale de iscarrigare in s'arretza; su situ chi oferit custos cuntènnidos pedit de installare un'estensione pro sighire. Custas estensiones parent ofèrrere sa possibilidade de personalizare is colores de su navigadore, e pro custu is chircadores ant postu a sa campànnia "Dormant Colors" (Colores dormende), ma su chi faghent in realidade est iscarrigare còdighe chi càmbiat is resurtados de is motores de chirca pro ammustrare sitos chi ant pagadu pro custu servìtziu.

Google e Mozilla averìguant is estensiones pro s'assegurare chi non fatzant dannu, ma calicuna nde podet fuire, duncas s'atentzione de s'impitadore est de importu.

Evitare custas e àteras estensiones prus dannàrgias est fàtzile e no est diferente meda de evitare su virus chi amegat de s'ispainare pro mèdiu de Linkedin, de chi amus giai chistionadu:

• Installare prus pagu estensiones possìbile e mai dae sitos disconnotos (impreare sa colletzione ufitziale);
• Impreare unu programma anti-virus cun protetzione pro sa navigatzione;
• Cunsiderare sa possibilidade de nde bogare is estensiones chi non serbint dae su navigadore, prus che totu si funtzionant comente descritu in custu artìculu o si su navigadore amegat de si cumportare in manera istròlica.