Meta dispidit a 11000 traballadores: ite acontesset?
Sa noa de sa dispidida de ùndighimigia traballadores de Facebook, Instagram e Whatsapp arribat a pagas dies dae s'annùntziu de sa dispidida de 3700 traballadores de Twitter. 14700 logos de traballu pèrdidos chi s'agiunghent a a is de Netflix, TikTok e àteras cumpangias chi òperant in servìtzios ìnternet. Ite amegat de acontèssere? Andamus a castiare prus acanta.
Una de is resones prus de importu paret sa previsione isballiada in contu de su mundu apusti-pandemia. S'inserramentu chi amus bìvidu intre su 2020 e, mancari prus pagu, su 2021 nos at portadu a s'impreu prus mannu de semper de is tecnologias acapiadas a sa retza: is retzas sotziales e is programmas de messageria sunt istados su mègius mèdiu pro sighire a comunicare cun amigos e famìlias, is prataformas de streaming nos ant agiudadu a gherrare contras s'arroscidura de dèpere abarrare in domo e is butegas in lìnia fiant is ùnicas in ue faghiat a comporare chene limitatziones (a foras de is imbios chi istentaiant a arribare). Unos cantos imprendidores creiant chi sa gente diat a àere sighidu impreende custos trastos semper de prus, fintzas una borta passadu su peus de sa pandemia, ma si sunt isballiados.
Facebook at pèrdidu impitadores medas e su balore de is atziones suas est caladu de prus de su 70%. Fintzas Twitter, dd'amus bidu, sufrit sa pèrdida de impitadores chi sunt seberende àteras prataformas. Unos cantos diàrios chistionant fintzas de crisi de is retzas sotziales, ma forsis est tropu chitzo pro una concruida de aici.
Pro cantu pertocat Meta, ddoe at fintzas su problema de s'investimentu in su chi narant metaversu, su chi diat a dèpere èssere unu mundu in realidade virtuale in ue impitadores potzant interoperare e aziendas potzant ofèrrere is servìtzios issoro. Is cosas però sunt andende in manera diferente: is servìtzios de su metaversu sunt pagos e no interessant meda a is impitadores, duncas fintzas is investidores non sunt cuntentos de is resursas chi Meta dèdicat a custu progetu.
Fontes:
- https://www.wired.it/article/meta-licenziamenti-musk-twitter/
- https://www.wired.it/article/meta-licenzia-taglia-posti-lavoro-italia/
- https://www.wired.it/article/licenziamenti-aziende-tech/
- https://www.wired.it/article/metaverso-nome-sbagliato-bcg-meta-social-gaming/
- https://www.wired.it/article/metaverso-non-esiste/
Cummenta