TikTok, fintzas a su mesi de donniasantu passau ligiat su còdixi MAC de is dispositivus de is impitadoris. Ndi chistionat Wired cun rifermentu a un'artìculu de Wall Street Journal. Su MAC est unu còdixi identificativu, diferenti po dònnia aparatu acapiau a s'arretza. Est un'informatzioni chi is agentzias publicitàrias iant a bolli sciri po ita ca permitit de scoberri cali giassus is usuàrius abìsitant e duncas su gustu insoru. S'acessu a su MAC in Android est proibiu de Google, ma fiat possìbili gràtzias a una debilesa de Android.

De pagu tempus a oi, Facebook at decìdiu de gherrai contras a sa difusioni de is noas farsas, siat burrendi is càpius chi no arrespetant is "standard de sa comunidadi" (linguàgu gherristu, ratzismu, spam, etc), siat ponendi is etichetas de averiguu a is noas, cun s'agiudu de agentzias esternas. Custa solutzioni permitit de informai is impitadoris in contu de sa validesa de is noas chi funt ligendi, chena censurai is chi arresurtant farsas apustis de s'averiguu.
Cun s'evolutzioni de sa pandemia de COVID unu scenàriu nou est bessiu a pilu: noas beras chi funt bessias tropu bècias e donant imoi un'informatzioni faddia.

Google Play Mùsica est una de cussas aplicatzionis chi medas de nosu no impreant ma chi no fait a bogai de su telefoneddu, ca funt cunsideradas "aplicatzionis de sistema". Serbit a comporai mùsica, a sa pròpiu manera de iTunes e Amazon Music e permitit fintzas de dd'ascurtai comenti in Spotify. Comenti e chi siat, Google at decìdiu de dda serrai a fini de ocannu. Is funtzioni suas ant a essi postas a disponimentu de YouTube Music, innui is impitadoris podint portai sa mùsica chi ant giai comporau, po no dda perdi.

Cun unu messàgiu curtzu, Toshiba at decrarau in su giassu suu chi at lassau sa cuota sua de Dynabook a sa Sharp. Dynabook est su nòmini nou de Toshiba Client Solutions Co., Ltd a pustis chi Sharp nd'at comporau sa parti manna. In custa manera, Toshiba est bessida a foras de su setori de is elaboradoris personalis.

Microsoft est circhendi de comporai TikTok, s'arretza sociali famada meda intra is prus giòvunus. Sa tentada de cobru si ponit in su cuntestu de s'ascru internatzionali intra is Stadus Unius de Amèrica e sa Cina. Difatis, su presidenti Donald Trump at decrarau chi TikTok at a depi serrai in is USA chi sa propiedadi no colat a un'asienda americana.

Cortana, s'assistenti vocali de Microsoft est arribada in su 2014 impari cun Windows Phone 8.1 ma, comenti su sistema Microsoft po telefoneddus, no est arrennèscia a intrai in su coru de is impreadoris e duncas Microsoft at decìdiu de dda bogai de is dispositivus iOS, Android a incumentzai de su 2021. Dd'at annuntziau sa Microsoft etotu in un'artìculu in su giassu suu.

Google at publicau sa versioni 84 de su navigadori suu, Chrome. Sa publicatzioni est arribada tradu, comenti po totu is versionis a incumentzai de sa 81, po mori de su traballu chi est andendi prus a bellu in custu tempus de pandèmia. Is noas, impari cun sa normali curretzioni de faddinas, tocant sa seguresa e s'agiunta de funtzionis noas.

No fiat difìcili de bisai chi Facebook bolessit auniri a unu certu puntu totu is aplicatzionis de messàgius suas in una sceti o a su mancu de fai a manera chi siat prus fàcili a comunicai cun is impreadoris de s'una o de s'àteru e dd'iat fintzas cunfirmau Zuckerberg s'annu passau. Unu programadori at scritu un'artìculu apitzus de s'incomentzu de sa possibilidadi de auniri Messenger cun Instagram, mancai siat ancora sceti una proa tènnica chi podit essi tirada me is mesis chi benint.

S'arregorta de firmas po su domìniu .srd est inghitzada giai de diora meda e sighit cun s'agiudu de is sardus e de is amantiosus de sa Sardìnnia chi nci creint.
Su domìniu de primu livellu, dd'arregordaus, est sa parti apustis de s'ùrtimu puntu in s'indiritzu de unu situ. Bì sa letzioni apitzus de su Web po prus informatzionis.

Funt sceti 4 millionis is scarrigamentus de s'app Immuni, su programa po telefoneddus chi depiat agiudai a firmai sa spraxidura de s'impestu de COVID-19. Est unu nùmeru meda prus bàsciu de su 60% de sa populatzioni chi fiat sa percentuali de segudai po podi funtzionai beni. Su scarrigamentu no est obligatòriu e in nisciunu casu ddu podit essi pro mori de sa costitutzioni italiana e de is leis in contu de privadesa, ma su guvernu italianu sperat de cunvinci prus genti cun una publicidadi prus manna me is diis chi benint.