Comenti annuntziau in duas noas de s'ANSA, Twitter at decìdiu de bogai is messàgius cun noas farsas apitzus de is vacinus contas a su Coronavirus. Youtube in s'interis at a incumentzau a bogai is vìdeus cun sa teoria de s'ingannu de is eletzionis in is Stadus Unius, bintas de Biden, cun Trump chi sighit a decrarai chi issu ddas apat bintas cun s'ingannu.
Est faendi su giru de su Web in custas diis sa noa de is ativistas Anti-5G chi ant pigau una gàbia de Faraday po blocai is undas eletromannièticas de s'incaminadori de arretza (router) e a pustis si-ndi funt chesciaus poita ca s'arretza WiFi no funtzionàt prus.
No si cumprendit beni ita nc'intrint custus dispositivus domèsticus cun su 5G: podit essi chi, a su sòlitu, is prus pagu espertus cunfundant su 5G de sa telefonia mòbili cun is arretzas WiFi a 5Ghz, duas cosas dessintotu diferentis. Craru chi una gàbia de Faraday progetada po blocai is undas a 5Ghz at a blocai s'arretza WiFi (tantu balit a dda studai) e comenti e chi siat no serbit a nudda contras a su 5G.
De ogetus che custu si-nd'agatant medas me in Amazon e a nai sa beridadi no est sa primu borta chi nd'intendeus chistionai, giai chi càncua borta agataus fintzas me is potacarias cussus "croxus" po telefoneddus chi iant a depi blocai is undas.
PHP, su linguàgiu de programatzioni web prus famau est lòmpiu a sa versioni 8.0 a cincu annus de sa 7.0 e apustis de àteras cuàturu versionis intermèdias chi ant introdùsiu càmbius de importu.
Abellu abellu, PHP est passau de linguàgiu legixeddu ma còmudu po fai situs e aplicatzionis Web a trastu prus sèriu, orientau a is ogetus, seguru e lestu. Cun custa versioni noa s'arricat de funtzionis e piessìnnius chi de una parti dd'acostant a linguàgius prus traditzionalis e de un'àtera ndi fain
"In totu s'Europa is fortzas de politzia, autoridadis localis e asiendas privadas funt spraxendi a scusi tecnologias sperimentalis e forrogadoras chi sighint, analisant e mudant a ogetus is facis nostas e is corpus nostus candu nosi moveus in is logus pùblicus. Custus ùrtimus funt de difendi, po chi in issus is deretus nostus, is libertadis nostas e is comunidadis nostas siant amparaus."
Custa est s'introdutzioni a sa petitzioni "Torra a ti pigai sa faci" po pediri de proibiri sa guardiania biomètrica, impreada in calincunu logu e pranificada o sperimentada in àterus. Cun custa genia de guardiania is sistemas informàticus podint connosci is caras de donniunu de nosu e arregistrai is movimentus nostus, mancai sinnalendi-ddus a is autoridadis candu su sistema ddus classìficat che "atividadi assumbrida".
Is eletzionis me is Stadus Unius parint fatas, ma Facebook at decìdiu de blocai po un'àteru mesi totu is annùntzius polìticus e de lassai ativu su Centru de Informatzioni apitzus de su votu po sighi a cuntrollai su contu de is votus, chi est prus longu po mori de su votu postali, chi genti meda at sceberau po sa dificultadi de si movi de domu in mesu a sa pandemia de Covid-19.
Immuni, s'aplicatzioni italiana de annotu de is cuntatus progetada po cumbati sa spraxidura de su Coronavirus Sars-Cov-2, at tentu un'incumintzu stentosu, cun is scarrigamentus firmus a 4 millionis sceti in su mesi de argiolas passau. Cun sa segunda aundada de impestus custu nùmeru est arribau a 9,36 millionis su 25 de su mesi de ladàmini.
Apustis de s'antitrust americanu, puru s'anti-monopòliu italianu ipotisat un'abusu de sa positzioni de domìniu de Google. Su problema custa borta est s'impreu de is datus po s'elaboratzioni de sa publicidadi.
Google est stètia acusada de impedumai a is asiendas concurrentis de ponni elementus de sighidura de sa navigatzioni in su web de is usuàrius po èssi s'ùnica a podi arregolli custus datus.
Si bollu sinnalai un'idea de interessu po favoressi sa localisadura de totu is programmas e, pruschetotu, donai sa possibilidadi a is regionis linguìsticas de minoria de tenni programas furriaus in sa lìngua insoru.
Seus chistionendi de su Manifestu po una tecnologia linguìstica aberta, chi totus podeus firmai in su giassu web suu.
Google est stètia acusada de su governu de is Stadus Unius e s'Antitrust de pràticas anti-concurrèntzia po tenni sa positzioni sua de monopòliu.
Segundu Il Sole 24 Ore, s'acusa est de ai pagau asiendas tennològicas po mantenni Google comenti motori de circa predefiniu. In custa manera, sa parti manna de is circas sighit a essi fata a traessu de cussu permitendi-ddi de gadangiai sèmpiri de prus.
