Crescint is scarrigamentus de Immuni

Immuni, s'aplicatzioni italiana de annotu de is cuntatus progetada po cumbati sa spraxidura de su Coronavirus Sars-Cov-2, at tentu un'incumintzu stentosu, cun is scarrigamentus firmus a 4 millionis sceti in su mesi de argiolas passau. Cun sa segunda aundada de impestus custu nùmeru est arribau a 9,36 millionis su 25 de su mesi de ladàmini.

S'aplicatzioni depiat essi una de is armas contras a sa maladia de Covid-19, impari cun s'impreu de sa mascaredda e sa stesiada de seguràntzia, ma s'impreu suu no podit essi obigatòriu poita ca custu iat a essi  contràriu a sa costitutzioni de su stadu italianu. Est bessida giai in sa fasi de progetu su centru de duas propagandas: una in cunsensu a banda de su guvernu e de is sustenidoris suus; s'àtera chi dda cunsiderat dannosa e ndi scunsillat s'impreu.
Genti meda, apensamentada po sa privadesa, at arrefudadu de dda scarrigai, ma incapas s'atzìchidu po custa segunda pesada de su nùmeru de malàdius at fatu cambiai de idea a calincunu de issus.

Arregordaus puru chi unas cantu regionis tenint is aplicatzionis insoru de sighidura de is contatus, cumenti "Sardegna Sicura" de sa Regioni Autònoma de Sardìnnia.