No fiat difìtzile de bisare chi Facebook boleret aunire a unu tzertu puntu totu is aplicatziones de messàgios suas in una isceti o a su mancu de fàghere a manera chi siat prus fàtzile a comunicare cun is impreadores de s'una o de s'àtera e dd'aiat fintas cunfirmadu Zuckerberg s'annu passadu. Unu programmadore at iscritu un'artìculu a pitzus de s'incumentzu de sa possibilidade de unire Messenger cun Instagram, mancari siat ancora isceti una proa tècnica chi podet èssere tirada in is meses chi benint.

Sa regorta de firmas pro su domìniu .srd est inghitzada giai dae diora meda e sighit cun s'agiudu de is sardos e de is amantiosos de sa Sardigna chi nche creent.
Su domìniu de primu livellu, ddu regordamus, est sa parte a pustis de s'ùrtimu puntu in s'indiritzu de unu situ. Bide sa letzione a pitzus de su Web pro prus informatziones.

Sunt isceti 4 milliones is iscarrigamentos de s'app Immuni, su programma pro telefoneddos chi depiat agiudare a firmare s'isparghidura de s'impestu de COVID-19. Est unu nùmeru meda prus bàsciu de su 60% de sa populatzione chi fiat sa pertzentuale de segudare pro pòdere funtzionare bene. S'iscarrigamentu no est obligatòriu e in nisciunu casu ddu podet èssere pro more de sa costitutzione italiana e de is leges in contu de privatesa, ma su guvernu italianu isperat de cumbìnchere prus gente cun una publitzidade prus manna in is dies chi benint.

Adobe nos informat chi su 31 de Idas 2020 at a acabbare de annoare e cumpartire su Flash Player, programma chi est istadu pro medas annos sa base de medas giassis Web, incluidu Youtube, ma chi a incumentzare de su 2015 at inghitzadu a èssere mudadu cun solutziones HTML5, prus lèbias, prus seguras e prus adatas a funtzionare in telefoneddos e àteros dispositivos mòbiles.

Una de is noas de importu prus mannu in sa cunferèntzia de is isvilupadores de Apple de ocannu est sa detzisione de lassare is protzessores Intel a pustis de 15 annos pro impreare is protzessores issoro, is Apple Silicon.

Su progetu FreeDOS at organizadu pro su 29 de làmpadas a is 16 de s'oràriu nostru, un'addòbiu pro festare is 26 annos de atividade.

Una relata de Awake Security at sinnaladu chi unas cantas estensiones malas de Google Chrome tenent sa possibilidade de furare datos dae is dispositivos de is usuàrios.

Mozilla est traballende a una retze VPN chi pro su momentu est in fase beta e a disponimentu isceti in pagas regiones de su mundu. Sa promissa de Mozilla est de pònnere a disponimentu una VPN fàtzile de impreare e fata segundu is opiniones de is impreadores e de is netzessidades issoro.

Microsoft at annoadu su sistema operativu suo in Maju cun sa publicatzione de Windows 10 May 2020. No est unu càmbiu cumpridu de sistema, ma unu megioramentu mannu de is funtziones de su sistema chi esistiant giai. A dolu mannu, is impreadores chi ant installadu custa versione noa ant tentu medas problemas.

A pustis de s'ùrtimu annoamentu, Telegram ammustrat unu messàgiu chi cumbidat s'impreadore a cambiare versione de su sistema operativu cun una a 64 bit o no at a pòdere annoare Telegram incumentzende dae su 1 de cabudanni.