Microsoft Duo est un'aparatu chi simìgiat a una tauledda, ma partzidu  in duas alas chi si podent serrare che unu libru, cadauna cun un'ischermu de 5,6". Is duos ischermos si podent impreare a manera indipendente o a manera de formare un'ischermu mannu. Su dispositivu portat unu protzessore Qualcomm Snapdragon 855, 6 GB de RAM, 128 o 256 GB de memòria de massa, fotocàmera de 11 megapixel, connessione LTE e sistema Windows 10.

Fiat ora! - at a àere pensadu calicunu. Telegram siat annuntziadu de traballare a is vìdeu-tzerriadas in su 2017 e mancari in antis puru, cando fiat un'aplicatzione pro messàgios de testu isceti. Is tzerriadas sunt arribbadas in su martzu 2017 e amus abetadu àteros 3 annos pro su vìdeu, chi immoe est a disponimentu pro dispositivos Android e iOS, mancari ancora in versione alpha.

Bos apo giai chistionadu de sa batalla pro su domìniu .srd. In custu ùrtimu mese, cun una presèntzia prus manna in is retzas sotziales, prus che totu Facebook, Andrea Maccis e is àteros promovidores sunt resèssidos a fàghere cumprèndere a gente meda su sentidu de custa recherta, bene resuminada in s'islogan "Pesaus a solus sa màgini nosta cun su domìniu .srd", arribbende a 5000 firmas in sa petitzione, metade de su caminu pro 10000 chi est sa punna.

TikTok, fintzas a su mese de onniasantu passadu leghiat su còdighe MAC de is dispositivos de is impitadores. Nde chistionat Wired cun riferimentu a un'artìculu de Wall Street Journal. Su MAC est unu còdighe identificativu, diferente pro onni aparatu acapiadu a sa retze. Est un'informatzione chi is agentzias publitzitàrias diant a bòlere ischire pro ite ca permitit de iscobèrrere cales giassos is usuàrios visitant e duncas su gustu issoro. S'atzessu a su MAC in Android est proibidu dae Google, ma fiat possìbile gràtzias a una debilesa de Android.

Dae pagu tempus a oe, Facebook at detzìdidu de gherrare contras a sa difusione de is noas farsas, siat burrende is càbidos chi non respetant is "standard de sa comunidade" (limbàgiu gherristu, ratzismu, spam, etc), siat ponende is etichetas de averìguu a is noas, cun s'agiudu de agentzias esternas. Custa solutzione permitit de informare is impitadores in contu de sa balidesa de is noas chi sunt leghende, chena tzensurare is chi resurtant farsas a pustis de s'averiguu.
Cun s'evolutzione de sa pandemia de COVID un'iscenàriu nou est essidu a pilu: noas beras chi sunt essidas tropu betzas e donant immoi un'informatzione faddida.

Google Play Mùsica est una de cussas aplicatziones chi medas de nois no impreant ma chi no faghet a bogare dae su telefoneddu, ca sunt cunsideradas "aplicatziones de sistema". Serbit a comporare mùsica, a sa pròpiu manera de iTunes e Amazon Music e permitit fintzas de dd'ascurtare comente in Spotify. Comente si siat, Google at detzìdidu de dda serrare a fine de ocannu. Is funtziones suas ant a èssere postas a disponimentu dae YouTube Music, in ue is impitadores podent portare sa mùsica chi ant giai comporadu, pro no dda pèrdere.

Cun unu messàgiu curtzu, Toshiba at decraradu in su giassu suo chi at lassadu sa cuota sua de Dynabook a sa Sharp. Dynabook est su nòmine nou de Toshiba Client Solutions Co., Ltd a pustis chi Sharp nd'at comporadu sa parte manna. In custa manera, Toshiba est essida a foras de su setore de is elaboradores personales.

Microsoft est chirchende de comporare TikTok, sa retza sotziale famada meda intre is prus giòvanos. Sa tentada de cobru si ponet in su cuntestu de s'ascu internatzionale intre is Istados Unidos de Amèrica e sa Tzina. Difatis, su presidente Donald Trump at decraradu chi TikTok at a dèpere serrare in is USA si sa propiedade no colat a un'azienda americana.

Cortana, s'assistente vocale de Microsoft est arribbada in su 2014 in pari cun Windows Phone 8.1 ma, comente su sistema Microsoft pro telefoneddos, no est renèssidu a intrare in su coro de is impreadores e duncas Microsoft at detzìdidu de dda bogare dae is dispositivos iOS e Android a incumentzare dae su 2021. Dd'at annuntziadu sa Microsoft etotu in un'artìculu in su giassu suo.

Google at publicadu sa versione 84 de su navigadore suo, Chrome. Sa publicatzione est arribada tardu, comente pro totu is versiones a incumentzare dae sa 81, pro more de su traballu chi est andende prus a bellu in custu tempus de pandèmia. Is noas, in pari cun sa curretzione normale de faddinas, tocant sa seguresa e s'agiunta de funtziones noas.