Est faghende su giru de su Web in custas dies sa noa de is ativistas Anti-5G chi ant pigadu una gàbbia de Faraday pro blocare is undas eletromannièticas de s'incamminadore de retze (router) e a pustis si nde sunt chesciados pro ite ca sa retze WiFi no funtzionaiat prus.
Non si cumprendet bene ite nc'intrent custos dispositivos domèsticos cun su 5G: podet èssere chi, a su sòlitu, is prus pagu espertos confundant su 5G de sa telefonia mòbile cun is retzes WiFi a 5Ghz, duas cosas de s'in totu diferentes. Craru chi una gàbbia de Faraday progetada pro blocare is undas a 5Ghz at a blocare s'arretza WiFi (tantu balet a dd'istudare) e comente e chi siat non serbit a nudda contras a su 5G.
De ogetos che custu si nd'agatant medas in Amazon e a nàrrere sa beridade no est sa primu borta chi nd'intendemus chistionare, giai chi carchi borta agatamus fintzas in is potecarias cussos "còrgios" pro telefoneddos chi diant a dèpere blocare is undas.

PHP, su limbàgiu de programmatzione web prus famadu est lòmpidu a sa versione 8.0 a chimbe annos dae sa 7.0 e a pustis de àteras bator versiones intermèdias chi ant introdùidu càmbios de importu.
A bellu a bellu, PHP est passadu dae limbàgiu legigheddu ma còmodu pro fàghere sitos e aplicatziones Web a trastu prus sèriu, orientadu a is ogetos, seguru e lestru. Cun custa versione noa s'arricat de funtziones e piessìnnios chi dae una parte dd'acostant a limbàgios prus traditzionales e dae un'àtera nde faghent unu trastu modernu meda. Andamus a bìdere cales sunt is novidades prus de importu.

"In totu s'Europa is fortzas de politzia, autoridades locales e aziendas privadas sunt isparghinende a s'iscùsia tecnologias isperimentales e forrogadoras chi sighint, analizant e mudant a ogetos is faches nostras e is corpus nostros cando nos movemus in is logos pùblicos. Custos ùrtimos sunt de difèndere, pro chi in issos is deretos nostros, is libertades nostras e is comunidades nostras siant amparados."
Custa est s'introdutzione a sa petitzione "Torra a ti pigare sa fache" pro pedire de proibire sa guardiania biomètrica, impreada in calicunu logu e pranificada o isperimentada in àteros. Cun custa genia de guardiania is sistemas informàticos podent connòschere is caras de onniunu de nois e registrare is movimentos nostros, mancari sinnalende·ddos a is autoridades cando su sistema ddos classìficat che "atividade assumbrada".

Is eletziones in is Istados Unidos parent fatas, ma Facebook at detzìdidu de blocare pro un'àteru mese totu is annùntzios polìticos e de lassare ativu su Tzentru de Informatzione a pitzus de su votu pro sighire a controllare su contu de is votos, chi est prus longu pro more de su votu postale, chi gente meda at seberadu pro sa dificultade de si mòere de domo in mesu a sa pandemia de Covid-19.

Immuni, s'aplicatzione italiana de annotu de is cuntatos progetada pro cumbàtere s'isparghidura de su Coronavirus Sars-Cov-2, at tentu un'incumintzu istentosu, cun is iscarrigamentos firmos a 4 milliones isceti in su mese de argiolas passadu. Cun sa segunda aundada de impestos custu nùmeru est arribadu a 9,36 milliones su 25 de su mese de ledàmene.

A pustis de s'antitrust americanu, puru s'anti-monopòliu italianu ipotizat un'abusu de sa positzione de domìniu de Google. Su problema custa borta est s'impreu de is datos pro s'elaboratzione de sa publitzidade.
Google est istada acusada de impedumare a is aziendas concurrentes de pònnere elementos de sighidura de sa navigatzione in su web de is usuàrios pro èssere s'ùnica a pòdere regollere custos datos.

Bos bògio sinnalare un'idea de interessu pro favorèssere sa localizadura de totu is programmas e, prus che totu, donare sa possibilidade a is regiones linguìsticas de minoria de tènnere programmas furriados in sa limba issoro.
Semus chistionende de su Manifestu pro una tecnologia linguìstica aberta, chi totus podimus firmare in su giassu web suo.

Google est istada acusada dae su guvernu de is Istados Unidos e s'Antitrust de pràticas anti-concurrèntzia pro tènnere sa positzione sua de monopòliu.

Segundu Il Sole 24 Ore, s'acusa est de àere pagadu aziendas tecnològicas pro mantènnere Google comente motore de chirca predefinidu. In custa manera, sa parte manna de is chircas sighit a èssere fata a traessu de cussu permitende-ddi de gadangiare semper de prus.

Gràtzias a su traballu de sa truma de Sardware, su PinePhone immoe chistionat sardu puru.

Su Lenovo ThinkPad X1 Fold est su primu portàtile cun ischermu mugiaditu. Essidu a pustis de duos annos de traballu, est un'elaboradore de 13,3" cun protzessore Intel Lakefield, 8GB de RAM e 1TB de discu fissu. Est cumpatìbile cun s'istandard 5G e impreat Windows 10 comente sistema.