Vacinus contras a su COVID bèndidos a iscùsia

Un'artìculu in su blog de Kaspersky nos faghet ischire chi cun sa pandemia de COVID-19 est incumentzadu unu mercadu cuadu in su web iscuru (dark web) in ue si bendent artìculos de protetzione, comente is mascareddas, e fintzas su vatzinu, cun prètzios chi andant dae 250$ a 1200$, o tzertificados farsos de vatzinu pro is chi bolent biagiare sena ddu fàghere.

Is artìculos s'agatant in logos de sa retze difìtziles de agatare, comente grupos privados de servìtzios de messàgios o retzes sotziales o giassos in serbidores privados. Pro su pagamentu si preferint is cripto-monedas chi sunt prus difìtziles de sighire dae is autoridades.

Craru est chi custas cosas no andant pigadas pro nissuna resone. Is vatzinos podent èssere farsos e non ddoe at manera de dd'averiguare, ma fintzas si sunt beros podent èssere furados e/o arregulados male e duncas podent fàghere dannu o non fàghere efetu perunu. Fintzas sa còmpora podet èssere proibida dae sa lege e andat a intzullire su cumportamentu pagu èticu de chie non si firmat mancu in antis a sa maladia pro balàngiu.