Whatsapp: arribat s'impreu dae prus dispositivos e is foto temporàneas

Segundu un'artìculu de WhatsApp Beta Info, s'aplicatzione de messàgios prus famada de su mundu est acanta a donare sa possibilidade de èssere impreada cun fintzas a 4 dispositivos a su pròpiu tempus sena dèpere lassare su dispositivu primàriu acapiadu a Internet. In prus, ant a arribare is messàgios, fotografias e àteros mèdias chi s'ant a cantzellare a solos a pustis chi s'arritzidore ddos at castiados.

Alessandro Paluzzi, espertu de ingenneria a s'imbesse, acrarat chi custas funtziones sunt giai in su còdighe de s'aplicatzione ma sunt cuadas pro ite ca is tènnicos de Whatsapp ddas sunt ancora collaudende. Chi totu funtzionat comente pranificadu, ant a èssere publicadas in is versiones de WhatsApp chi benent.

A nàrrere sa veridade, custas funtziones no sunt noas pro totus. Impreadores de àteras aplicatziones che Telegram acostumant a ddas impreare de prus dispositivos sena imbargos e connoschent giai sa possibilidade de assetiare una resonada pro si cantzellare a solu a pustis de èssere lèghida. No ischimus pro ite unas cantas funtziones chi àteras app tenent sunt trighende a arribare in WhatApp. Podet èssere chi ddoe siant impedimentos in su progetu de s'incumentzu chi ancora depent èssere propassados.