Whatsapp: arribat s'impreu de prus dispositivus e is foto temporàneas

Segundu un'artìculu de WhatsApp Beta Info, s'aplicatzioni de messàgius prus famada de su mundu est acanta a donai sa possibilidadi de essi impreada cun fintzas a 4 dispositivus a su pròpiu tempus chena depi lassai su dispositivu primàriu acapiau a Internet. In prus, ant a arribai is messàgius, fotografias e àterus mèdias chi s'ant a cancellai a solus a pustis chi s'arricidori ddus at castiaus.

Alessandro Paluzzi, espertu de ingenneria a s'imbessi, acrarat chi custas funtzionis funt giai in su còdixi de s'aplicatzioni ma funt cuadas poita ca is tènnicus de Whatsapp ddas funt ancora collaudendi. Chi totu funtzionat comenti pranificau, ant a essi publicadas in is versionis de WhatsApp chi benint.

A nai sa beridadi, custas funtzionis no funt noas po totus. Impreadoris de àteras aplicatzionis che Telegram acostumant a ddas impreai de prus dispositivus chena imbargus e connoscint giai sa possibilidadi de assetiai un'arraxonada po si cancellai a solu a pustis de essi lìgia. No scieus poita unas cantu funtzionis chi àteras app tenint funt trighendi a arribai in WhatApp. Podit essi chi ddoi siant impedimentus in su progetu de s'incumentzu chi ancora depint essi propassaus.