Is noas de Android 11

Sa versione noa de Android est essida a prus de un'annu dae sa de deghe e is dispositivos cumpatìbiles dda sunt giai iscarrighende pro s'annoare. Aia giai chistionadu de unas cantas noas de custu sistema in un'artìculu de su martzu passadu. Andamus a bìere immoe una pariga de càmbios de importu pro s'esperièntzia de impreu.

1. Registratzione de s'ischermu
   Totus ischimus chi est possìbile a caturare un'istantànea de s'ischermu (screenshot), ma si bolimus fàghere unu vìdeu depimus installare un'app chi ddu permitat. Incumentzende dae sa versione 11 custu si podet fàghere sena dèpere impreare àteras aplicatziones.
2. Resonadas
   Is resonadas (chat) de is aplicatziones sunt agrupadas in sa parte arta de s'àrea de is abisos. Su programma chircat de imparare cale sunt is resonadas prus de importu pro nois e ddas ammustrat in antis de is àteras. Ddoe at puru is "bulluncas" de sa resonada comente in su Messenger de Facebook.
3. Menù nou pro istudare
   Su menù pro istudare su dispositivu ammustrat puru is seberos pro su controllu de sa domòtica.
4. Autorizatziones temporàneas
   Cando un'aplicatzione pedit s'autorizatzione a una funtzione de su sistema, est possìbile a dda dare una borta isceti. Is autorizatziones sunt bogadas a pustis chi non sunt impreadas pro tempus meda.
5. Fachigheddas noas
   Sa regorta de fachigheddas (Emoji) essit prus rica. Ancora, a dolu mannu, non nch'at sa bandera sarda!