Impreare su Messenger de Facebook in Linux

Medas de nois acostumant a imbiare e retzire messàgios in Facebook ma non sunt interessados a tènnere su situ o s'aplicatzione de Facebook aberta e duncas impreant s'app Messenger, chi però est a disponimentu isceti pro Windows e tzellulares. Ddoe fiat unu progetu de Messenger pro Linux unos cantos annos a oe, ma no esistit prus. Pro sorte, nch'est sa manera de assetiare un'àtera aplicatzione pro funtzionare comente Messenger.

Totus is impreadores de GNU/Linux connoschent Pidgin, aplicatzione a disponimentu fintzas pro Windows e connota puru comente Jabber. In s'incumintzu si podiat acapiare Pidgin a Facebook cun su protocollu XMPP, ma immoe custu non est prus possìbile. Podimus però impreare un'estensione. Bidemus comente:

1. Iscarrigade s'ùrtima versione de s'estensione de inoghe.
2. Aberide unu terminale in sa cartella in ue ais iscarrigadu s'archìviu.
3. Donade custos cumandos, cambiende * cun sa versione iscarrigada de s'estensione (a.e.: 0.9.6):

   tar xvf purple-facebook-*.tar.gz
   cd purple-facebook-*
   sudo apt install libjson-glib-dev libglib2.0-dev libpurple-dev
   ./configure
   make
   make install

4. Aberide Pidgin. Si est giai abertu, serrade·ddu e torrade a dd'abèrrere.
5. Si non bidides sa ventana pro agiùnghere su contatu, andade in Contos > Manìgiu de is contos > Agiunghe
6. Seberade Facebook comente protocollu, iscriide is datos de intrada e agiunghide su contu.
7. Fatu. Si is cosas sunt andadas bene, ais a bìdere s'elencu de is cuntatos bostros.

S'esperièntzia, craru, no est sa pròpiu de su Messenger originale, ma mègius de nudda e meda prus còmodu de dèpere intrare in Facebook ònnia borta chi bolemus iscrìere a is amigos.