Impreai su Messenger de Facebook in Linux

Medas de nosu acostumant a imbiai e arriciri messàgius in Facebook ma no funt interessaus a tenni su situ o s'aplicatzioni de Facebook aberta e duncas impreant s'app Messenger, chi perou est a disponimentu sceti po Windows e cellularis. Ddoi fiat unu progetu de Messenger po Linux unus cantu annus a oi, ma no esistit prus. Po sorti, nc'est sa manera de assetiai un'àtera aplicatzioni po funtzionai comenti Messenger.

Totus is impreadoris de GNU/Linux connoscint Pidgin, aplicatzioni a disponimentu fintzas po Windows e connota puru comenti Jabber. In s'incumintzu si podiat acapiai Pidgin a Facebook cun su protocollu XMPP, ma imoi custu non est prus possìbili. Podeus perou impreai un'estensioni. Bideus comenti:

1. Scarrigai s'ùrtima versioni de s'estensioni de innoi.
2. Aberrei unu terminali in sa cartella innui eis scarrigau s'archìviu.
3. Donai custus cumandus, cambiendi * cun sa versioni scarrigada de s'estensioni (a.e.: 0.9.6):

   tar xvf purple-facebook-*.tar.gz
   cd purple-facebook-*
   sudo apt install libjson-glib-dev libglib2.0-dev libpurple-dev
   ./configure
   make
   make install

4. Aberrei Pidgin. Chi est giai abertu, serrai-ddu e torrai a dd'aberri.
5. Chi no bieis sa ventana po agiungi su contatu, andai in Contus > Manìgiu de is contus > Agiungi
6. Scioberai Facebook comenti protocollu, scriei is datus de intrada e agiungei su contu.
7. Fatu, chi is cosas funt andadas beni, eis a biri s'elencu de is cuntatus bostus.

S'esperièntzia, craru, no est sa pròpiu de su Messenger originali, ma mellus de nudda e meda prus còmodu de depi intrai in Facebook dònnia borta chi boleus scriri a is amigus.