Est inghitzadu s'ùrtimu annu de Internet Explorer
Est istadu pro meda su navigadore de impreu prus mannu in su mundu, dd'amus odiadu meda comente impitadores e comente isvilupadores web. Dd'amus mudadu cun Firefox e Chrome regordende·ddu comente esempru de navigadore coanu, pagu seguru e pagu respetosu de is istandard. Fiat craru dae ora chi Internet Explorer fiat morende e immoe est ufitziale: sa versione 11, publicada in su 2013 at a èssere s'ùrtima. S'amparu acabbat su 17 austu de su 2021.
Microsoft at publicadu su pranu de s'acabbo de is progetos de IE e de Edge Legacy, versione de mesu intre su navigadore betzu e su nou, Edge, chi est resèssidu a torrare a gadangiare carchi impreadore, mancari non siat istimadu dae sa parte manna de is internàutas, ca sa majoria sighit a impreare Google Chrome.
Giai ocannu, su 30 de onniasantu, Microsoft Teams, sa prataforma professionale de Microsoft, no at a èssere prus cumpatìbile cun Explorer. Su 9 de martzu de su 2021 amus a nàrrere adiosu a Edge Legacy e amus a acabbare su camminu cun sa fine de Explorer su 17 austu 2021. Est sa fine de un'era. Si calicunu surrùngiat custu navigadore o nde tenet bisòngiu pro carchi motivu, podet impreare sa modalidade Internet Explorer in Edge.
Cummenta