Sighit sa batalla pro su domìniu .srd
Sa regorta de firmas pro su domìniu .srd est inghitzada giai dae diora meda e sighit cun s'agiudu de is sardos e de is amantiosos de sa Sardigna chi nche creent.
Su domìniu de primu livellu, ddu regordamus, est sa parte a pustis de s'ùrtimu puntu in s'indiritzu de unu situ. Bide sa letzione a pitzus de su Web pro prus informatziones.
Ddoe at medas resones pro pedire sa possibilidade de registrare unu domìniu pro sa Sardigna e no sunt totus de tipu indipendentista. Ònnia regione de su mundu tenet carchi cosa de ispetziale e comente sardos no dd'acabbamus mai de bantare totu su chi sa Sardigna podet ammustrare a su mundu, dae su paesàgiu e su folklore a sa calidade de is produtos nostros, sa limba, sa chirca e s'innovatzione sientìfica e àteras cosas meda. Si a beru creemus a totu custu, ite ddoe at de malu a ddu bòlere publitzizare cun unu domìniu chi regollat totu is sitos de e pro sa Sardigna?
Custa idea paret rivolutzionària, ma est de aici isceti in sa conca nostra, ca semus acostumados a pensare de tènnere su bisòngiu de s'amparu de entidades polìticas prus mannas, che s'Itàlia o is Istados Unidos e fintzas a si lassare cumbìnchere dae sa mentalidade benaltrista chi ddoe siat semper carchi cosa de importu prus mannu de pensare. In veridade àteras regiones ant pedidu e otentu unu domìniu. Esempros sunt sa Catalùnnia (.cat), su Galles (.cymru), is Ìsulas Cayman (.cym), s'Iscòtzia (.scot), etc.
Sighimus duncas a nche creere, a firmare e cumpartzire sa regorta de firmas e a regordare sa chistione a is polìticos nostros.
Cummenta