Funt arribadas is vìdeu-tzerriadas po Telegram

Funt arribadas is vìdeu-tzerriadas po Telegram

Butonis de sa mutida de TelegramFiat ora! - at a ai pensau calincunu. Telegram iat annuntziau de traballai a is vìdeu-tzerriadas in su 2017 e mancai innantis puru, candu fiat un'aplicatzioni po messàgius de testu sceti. Is tzerriadas funt arribadas in su martzu 2017 e eus abetau àterus 3 annus po su vìdeu, chi imoi est a disponimentu po dispositivus Android e iOS, mancai ancora in versioni alpha e duncas cun sa possibilidadi chi ddoi siant problemas in s'impreu de custa funtzioni noa. S'arraxoni po dd'ai introdùsia chitzi, chena abetai de ndi tenni una versioni stàbili est forsis sa gana de festai is 7 annus de s'aplicatzioni cun custu annùntziu de importu.

Po ativai su vìdeu depeus sceti incumentzai una mutida normali e apustis tocai su butoni "Video" in su schermu po ativai sa telecàmera. Sa ventanedda de su vìdeu podit essi impiticada po sighi a traballai cun su dispositivu fintzas in s'interis de s'arrexonu. Sa comunicatzioni intra is dispositivus est codificada po nd'assegurai sa privadesa. Podeus averiguai chi sa codìfica siat funtzionendi comenti po is tzarradas clàssicas, assegurendi-si chi is pròpiu cuàturu magineddas aparessant assusu in su schermu de is duus dispositivus.

Cun custa noa, Telegram si ponit in su pròpiu livellu de is cuncurrentis. A nai sa beridadi, Telegram teniat giai funtzionis meda chi is àteras no tenint o chi ant postu in òpera prus tradu, ma is vìdeu-tzerriadas funt de importu mannu po usuàrius meda e duncas no podiant amancai. Is svilupadoris ant giai annuntziau chi ant a arribai a curtzu fintzas is vìdeu-tzerriadas po is grupus.

Etichette

Cumenta