Windows XP est stètiu unu de is prus sistemas vidanus de Microsoft: publicau in su 2001, su suportu ofitziali est durau fintzas a su 2014, cun unu annoamentu spetziali in su 2017. Est colau tempus meda, est berus, e in s'interis Microsoft at publicau Windows Vista, 7, 8, 8.1, 10 e 11, ma me is annus de Windows XP genti meda at pigau unu o prus elaboradoris po domu e genti meda at preferiu a sighi impreendi XP fintzas me is annus de Vista, ca cussu fiat unu sistema arrannèsciu mali. Totu custus elaboradoris podint ancora essi impreaus, pruschetotu de cuddus impitadoris chi no tenint bisòngiu de potèntzia manna de càrculu. Is sistemas operativus nous perou funt tropu grais po ddoi funtzionai. Intra is solutzionis possìbilis, ddoi at installai unu sistema lèbiu, comenti una distributzioni de Linux po elaboradoris bècius o circai programas chi sigant funtzionendi in XP. Su navigadori Mypal est unu de cussus.

Una pariga de diis a oi eus chistionau de sa publicatzioni de una versioni noa de ReactOS, cloni de Microsoft Windows. Parrit duncas ironia chi apant publicau puru una versioni noa de FreeDOS, sistema operativu chi megat de clonai MS-DOS, àteru prodotu Microsoft chi impreaiaus innantis de sa publicatzioni de Windows 95.
Sa versioni noa est sa 1.3 e nd'eus chistionau un'annu e mesu a oi, creendi chi fessint acanta de ddu publicai.

Eus saludau s'annu 2021 cun una versioni noa de ReactOS, publicada su 16 de su mesi de idas. De ReactOS eus giai chistionau candu nd'ant publicau sa versioni passada: est unu sistema operativu lìberu in svilupu chi punnat a essi dessintotu cumpatìbili cun Microsoft Windows.

Is sintetizadoris vocalis tenint un'importu mannu oindii. Bastat a pensai a assistentis vocalis, navigadoris satellitaris, tradutoris automàticus cun funtzioni de ligi su testu, trastus de assistèntzia mèiga, de acessibilidadi e àteru ancora. Po cantu potzat parri difìcili de crei perou, sa sìntesi vocali est a disponimentu sceti po pagu lìnguas, meda prus pagu de 100, segundu is datus de is prataformas prus famadas. Gràtzias a su progetu SINTESA, intra custas lìnguas ddoi at su sardu puru. Connoscia giai su progetu, ma no ia tentu ancora s'ocasioni de ddu proai. Su mesi de idas passau fia in una libreria de Aristanis e apu biu su lìburu "Caratteri e strutture fonetiche, fonologiche e prosodiche della lingua sarda. Il sintetizzatore vocale SINTESA" imprentau de Condaghes, chi ndi descriit totu su traballu de circa e de svilupu e incluit unu DVD cun su còdixi e is archìvius prontus de su sintetizadori. Comenti informàticu, su lìburu no podiat amancai in sa libreria cosa mia e fia curiosu meda de proai s'arresurtau de totu cussu traballu.

Si-ddus arregordais is telefoneddus BlackBerry? Annus a oi ant fatu sa stòria de is telefoneddus intelligentis, bessendi famaus in cussu setori cun is mòllius insoru, chi ant sighiu a portai una tastera fìsica impari cun su schermu a tocu. Abellu abellu, is BlackBerry ant tentu sèmpiri prus pagu sorti, acabendi cun sa noa chi cras at a essi studada dessintotu s'arretza chi permitit a is dispositivus cun su sistema BlackBerryOS de funtzionai.

Comenti apu spricau prus bortas in custu diàriu, sa spainadura de is tecnologias de inteligèntzia artificiali est creendi unus cantu problemas a sa privatesa nosta, sendi chi cun s'impreu insoru bessit prus fàcili a sighi s'atividadi de is personis, in lìnia e in sa vida reali. Sa rivista Wired chistionat de duas noas chi si faint sperai chi is pràticas de sighidura digitali acabint o assumancu siant redùsias.

Una bella noa po is programadoris PHP de totu su mundu. Smarty, motori de templating PHP famau, est lòmpiu a sa versioni 4, apustis de calincunu annu de pagu atividadi chi faiat pensai a s'abandonu de su progetu, sendi chi programadoris medas me is ùrtimus annus ant preferiu Twig, su motori de su progetu Symfony.

Spotify est unu servìtziu impreau meda po ascurtai mùsica in lìnia me is ùrtimus annus. Unas cantu funtzionis suas funt praxas meda a is impitadoris, comenti sa creatzioni automàtica de listas de ascurtu personalizadas, cun un'algoritmu chi imparat su gustu de s'ascurtadori. Una funtzioni noa, mai impreada po imoi ma in cursu de brevetu, at giai mòviu is chèscias de Access Now, un'assòtziu po s'amànniu de is deretus tzivilis digitalis.

Sa telefonia mòbili est a sa de cincu generatzionis. Mancai medas de nosu tèngiant ancora aparatus de una pariga de annus a oi e duncas no siant ancora impreendi is tecnologias noas, de custu 5G nd'eus intèndiu chistionai giai tropu po is cumplotismus chi ddoi funt a giru, e fintzas po totu su manìgiu chi bolit su strantaxu de is arretzas noas, comenti s'òbligu de cambiai is aparatus televisivus po liberai unas cantu frecuèntzias de dedicai a sa telefonia. S'annu chi benit, un'àtera cosa de importu at a acuntessi: ant a studai su 3G.

Firefox, unu de is prus navigadoris web impreaus in su mundu, est a disponimentu in versioni Nightly in sardu.
Nd'at donau s'annùntziu Sardware, chi est aprontendi sa furriadura, ariseu 16 de donniasantu.
Sa Nightly est una versioni chi includit is ùrtimus càmbius, mancai custus potzant essi pagu stàbilis, innantis chi siant publicaus in una versioni bera de su programa. Sa lìngua sarda est prus o mancu a su 33%, duncas partis medas de testu ant a essi amostadas in inglesu, ma est un'incomentzu po podi sighi a traballai cun s'agiudu de sa comunidadi, chi podit cunsillai càmbius e sinnalai faddinas. Fatu custu, su sardu at a bessiri una de is lìnguas ofitzialis de Firefox candu lompit a su 100% de sa tradutzioni. Agiungu innoi s'annùntziu ofitziali de Sardware, cumbidendi a totus a proai Firefox in sardu e agiudai, si bolint. Pregontas, sinnalatzionis e cunsillus podint essi fatus in su Grupu Telegram de Sardware.