S'Unioni Europea aprovat su càrriga-baterias universali

Si-ndi chistionat de diora meda, ma a sa fini su Cunsillu de s'Unioni Europea at aprovau unu formau universali po is càrriga-baterias de telefoneddus, tauleddas, computeras portàtilis e àterus dispositivus.

Su formau sceberau est s'USB-C, sceberu bonu ca est prus forti de su bèciu (ma ancora impreau) micro-USB chi si strùpiat sèmpiri, fait a dd'impreai fintzas furriau a fundu in susu e est prus lestu.

Custu tipu de cavu at a essi obligatòriu po telefoneddus, tauleddas e dispositivus piticheddus nous a incumentzai de su 2024 e po is elaboradoris a incumentzai de su beranu 2026.

Sa decisioni, naraus sa beridadi, arribat bastanti tradu, sendi chi oramai sa parti manna de is dispositivus impreat cavus USB de diora. Su problema fiat meda prus mannu innantis de is annus 2010, candu dònnia marca e mòlliu de telefoneddu teniat unu cavu diferenti e duncas su càrriga-baterias no faiat prus a dd'impreai una borta chi su dispositivu fiat bèciu.

Sa màgini de s'atacu USB-C est pigada de Wikipedia.