OnlyFans est una prataforma chi permitit a is impitadoris suus de carrigai fotografias, vìdeus e àterus cuntènnius e de ddus oferri a pagamentu a is stimadoris (is fans). Est bessida famada poita ca unas cantu modellas dda impreant po bendi màginis de is corpus insoru, màginis chi bortas medas afigurant scenas pornogràficas.
OnlyFans at annuntziau chi custu no at a essi prus permìtiu a incumentzai de su mesi de ladàmini 2021.
Cantu bortas circhendi càncua cosa in unu motori de circa in su Web eus agatau sa pròpiu pregonta in Yahoo Answers? Custu si donàt assumancu su sentidu de no essi is ùnicus tontus a tenni cussa duda. Is arrespustas de sa comunidadi fiant a fitianu tontidadis, ma càncua borta giai s'ant agiudau.
In su noti intra su 9 e su 10 de martzu me in Strasburgo su fogu at fatu dannu a unu centru de datus de unu de is prus frunidoris mannus de servìtzius de informàtica in sa nui (cloud computing). S'efetu de custu disacatu est chi unus cantu servìtzius e giassus web no funt a disponimentu in custas ùrtimas diis. Custu poita ca su fogu at spèrdiu una parti de is elaboradoris e is tènnicus ant dèpiu studai totu is àterus.
Un'artìculu in su blog de Kaspersky nosi fait sciri chi cun sa pandemia de COVID-19 est incumentzau unu mercau cuau in su web scuru (dark web) innui si bendint artìculus de protetzioni, comenti is mascareddas, e fintzas su vacinu, cun prètzius chi andant de 250$ a 1200$, o certificaus farsus de vacinu po is chi bolint biagiai chena ddu fai.
In custas diis est girendi unu virus chi imbiat unu ligòngiu a is cuntatus de Messenger pregontendi "Tui ses custu? Là ita apu agatau". Faendi clic asuba a su ligòngiu bieus una pàgina chi parit sa domu de Facebook, pedendi de insertai s'indiritzu de posta eletrònica e sa crai de intrada.
De una pariga de diis, unus cantu grupus de no-vax, personis contràrias a is vacinus contra a su coronavirus Sars-CoV-2 responsàbili de sa maladia COVID-19, funt publichendi me is pàginas insoru unu schema elètricu chi nanca est "su chip 5G chi funt inferrendi cun su vacinu". Làstima ca calincunu si siat giai acatau chi cussu schema est de su distorsori po ghitarra "Metal Zone" de sa Boss.
Sa scuadra de Sardware at agiudau a bortai su situ web de s'Initziativa Citadina Europea #FreedomToShare, po legalizai sa cumpartzidura de archìvius. Firmai innoi: https://freesharing.eu/sc/. Sa cumpartzidura de cultura est de profetu po totu sa sotziedadi!
Comenti annuntziau in duas noas de s'ANSA, Twitter at decìdiu de bogai is messàgius cun noas farsas apitzus de is vacinus contas a su Coronavirus. Youtube in s'interis at a incumentzau a bogai is vìdeus cun sa teoria de s'ingannu de is eletzionis in is Stadus Unius, bintas de Biden, cun Trump chi sighit a decrarai chi issu ddas apat bintas cun s'ingannu.
Est faendi su giru de su Web in custas diis sa noa de is ativistas Anti-5G chi ant pigau una gàbia de Faraday po blocai is undas eletromannièticas de s'incaminadori de arretza (router) e a pustis si-ndi funt chesciaus poita ca s'arretza WiFi no funtzionàt prus.
No si cumprendit beni ita nc'intrint custus dispositivus domèsticus cun su 5G: podit essi chi, a su sòlitu, is prus pagu espertus cunfundant su 5G de sa telefonia mòbili cun is arretzas WiFi a 5Ghz, duas cosas dessintotu diferentis. Craru chi una gàbia de Faraday progetada po blocai is undas a 5Ghz at a blocai s'arretza WiFi (tantu balit a dda studai) e comenti e chi siat no serbit a nudda contras a su 5G.
De ogetus che custu si-nd'agatant medas me in Amazon e a nai sa beridadi no est sa primu borta chi nd'intendeus chistionai, giai chi càncua borta agataus fintzas me is potacarias cussus "croxus" po telefoneddus chi iant a depi blocai is undas.
Is eletzionis me is Stadus Unius parint fatas, ma Facebook at decìdiu de blocai po un'àteru mesi totu is annùntzius polìticus e de lassai ativu su Centru de Informatzioni apitzus de su votu po sighi a cuntrollai su contu de is votus, chi est prus longu po mori de su votu postali, chi genti meda at sceberau po sa dificultadi de si movi de domu in mesu a sa pandemia de Covid-19.
