OnlyFans bolit bandiri sa pornografia

OnlyFans est una prataforma chi permitit a is impitadoris suus de carrigai fotografias, vìdeus e àterus cuntènnius e de ddus oferri a pagamentu a is stimadoris (is fans). Est bessida famada poita ca unas cantu modellas dda impreant po bendi màginis de is corpus insoru, màginis chi bortas medas afigurant scenas pornogràficas.
OnlyFans at annuntziau chi custu no at a essi prus permìtiu a incumentzai de su mesi de ladàmini 2021.

Is arraxonis de custa decisioni parit chi siant diferentis. A primu, Apple, Google e Instagram nd'ant blocau s'integratzioni cun is prataformas insoru. No est possìbili po esempru a installai s'app de OnlyFans me is telefoneddus impreendi is butegas de iOS e Android.

Su prus eventu de importu, perou, est s'amenatza de Mastercard de blocai is pagamentus cun is tèsseras suas, comenti arrespusta a sa pressioni de grupus contràrius a su traballu sessuali. A sa pròpiu pressioni at giai dèpiu arrespundi PornHub, prataforma famada de vìdeus pornogràficus, permitendi sceti a is impitadoris averiguaus de carrigai cuntènnius. Is arraxonis de custas pressionis funt diferentis segundu su grupu: religiosas, èticas, e pruschetotu, ligadas a sa gherra a is abusus, giai chi me is ùrtimus annus est acuntèssiu prus bortas de scoberri chi vìdeus chi girànt in Internet fiant arresurtau de violèntzias o porno-vengàntzias.

Sa decisioni de OnlyFans de seguru at a pesai calincuna cuntierra. A primu, at a tocai a araxonai, comenti apu nau prus de una borta, apitzus de su poderi de is prataformas, a incumentzai de is produtoris de is sistemas operativus po arribai a is sotziedadis de is pagamentus, giai chi me is ùrtimus annus s'amenatza de blocus e bandus ant controllau meda is informatzionis e is cuntènnius in s'arretza, controllu chi no iat a essi tarea de sotziedadis privadas. Un'àteru argumentu est sa possibilidadi po is traballadoris sessualis de sighi a traballai in forma legali. Unus cantu fueddus de interessu apitzus de custu argumentu ddus at arregortu Wired in s'artìculu suu.