Twitter e Youtube puru bogant is noas farsas

Comenti annuntziau in duas noas de s'ANSA, Twitter at decìdiu de bogai is messàgius cun noas farsas apitzus de is vacinus contas a su Coronavirus. Youtube in s'interis at a incumentzau a bogai is vìdeus cun sa teoria de s'ingannu de is eletzionis in is Stadus Unius, bintas de Biden, cun Trump chi sighit a decrarai chi issu ddas apat bintas cun s'ingannu.

Parit craru in custu perìudu stòricu chi is noas chi girant in ìnternet tèngiant un'importu mannu e si depat circai de agiudai a is ligidoris a no si fai cumbinci de teorias chena fundamentu. Difìcili a nai perou si custa manera, una censura bera, at a serbiri deaderus e no at a fai pensai a s'imbressi chi si circat de proibiri dònnia forma de pensamentu chi no siat sa bia ofitziali. Sa solutzioni de Facebook, chi ponit avisus asuba a is noas cun informatzionis in contu de s'averìguu, parit mellus, ca no censurat is messàgius, lassendi is usuàrius lìberus de ligi totu is versionis de una teoria e si fai un'idea prus ampra. Sa censura, difatis, no est mai stètia una solutzioni bona po nisciunu problema.