Programmas pro telefoneddu

A sa gente is app de sighidura de is cuntatos no praghent. Dd'amus cumprèndidu cun Immuni chi, mancari sa segunda aundada apat cumbintu prus gente a dd'iscarrigare, sighit a èssere unu fallimentu, comente at arregordadu puru su programma TV Otto e mezzo de su 22/12/2020. Duncas custas aplicatziones chi diant a dèpere sinnalare is cuntatos cun persones impestadas dae su Coronavirus nou (SARS-CoV-2) responsàbile de sa COVID-19 non sunt donende s'agiudu isperadu.

In Ispànnia is cosas no andant mègius pro "Radar Covid", s'aplicatzione chi cumprit sa pròpiu funtzione. A inghitzu de su mese de Idas dd'aiat iscarrigada isceti su 14,4% de sa populatzione, unu nùmeru chi no bastat pro dda fàghere funtzionare comente progetadu.

Immuni, s'aplicatzione italiana de annotu de is cuntatos progetada pro cumbàtere s'isparghidura de su Coronavirus Sars-Cov-2, at tentu un'incumintzu istentosu, cun is iscarrigamentos firmos a 4 milliones isceti in su mese de argiolas passadu. Cun sa segunda aundada de impestos custu nùmeru est arribadu a 9,36 milliones su 25 de su mese de ledàmene.

Gràtzias a su traballu de sa truma de Sardware, su PinePhone immoe chistionat sardu puru.

Segundu un'artìculu de WhatsApp Beta Info, s'aplicatzione de messàgios prus famada de su mundu est acanta a donare sa possibilidade de èssere impreada cun fintzas a 4 dispositivos a su pròpiu tempus sena dèpere lassare su dispositivu primàriu acapiadu a Internet. In prus, ant a arribare is messàgios, fotografias e àteros mèdias chi s'ant a cantzellare a solos a pustis chi s'arritzidore ddos at castiados.

Sa versione noa de Android est essida a prus de un'annu dae sa de deghe e is dispositivos cumpatìbiles dda sunt giai iscarrighende pro s'annoare. Aia giai chistionadu de unas cantas noas de custu sistema in un'artìculu de su martzu passadu. Andamus a bìere immoe una pariga de càmbios de importu pro s'esperièntzia de impreu.

Fiat ora! - at a àere pensadu calicunu. Telegram siat annuntziadu de traballare a is vìdeu-tzerriadas in su 2017 e mancari in antis puru, cando fiat un'aplicatzione pro messàgios de testu isceti. Is tzerriadas sunt arribbadas in su martzu 2017 e amus abetadu àteros 3 annos pro su vìdeu, chi immoe est a disponimentu pro dispositivos Android e iOS, mancari ancora in versione alpha.

Google Play Mùsica est una de cussas aplicatziones chi medas de nois no impreant ma chi no faghet a bogare dae su telefoneddu, ca sunt cunsideradas "aplicatziones de sistema". Serbit a comporare mùsica, a sa pròpiu manera de iTunes e Amazon Music e permitit fintzas de dd'ascurtare comente in Spotify. Comente si siat, Google at detzìdidu de dda serrare a fine de ocannu. Is funtziones suas ant a èssere postas a disponimentu dae YouTube Music, in ue is impitadores podent portare sa mùsica chi ant giai comporadu, pro no dda pèrdere.

Cortana, s'assistente vocale de Microsoft est arribbada in su 2014 in pari cun Windows Phone 8.1 ma, comente su sistema Microsoft pro telefoneddos, no est renèssidu a intrare in su coro de is impreadores e duncas Microsoft at detzìdidu de dda bogare dae is dispositivos iOS e Android a incumentzare dae su 2021. Dd'at annuntziadu sa Microsoft etotu in un'artìculu in su giassu suo.

Sunt isceti 4 milliones is iscarrigamentos de s'app Immuni, su programma pro telefoneddos chi depiat agiudare a firmare s'isparghidura de s'impestu de COVID-19. Est unu nùmeru meda prus bàsciu de su 60% de sa populatzione chi fiat sa pertzentuale de segudare pro pòdere funtzionare bene. S'iscarrigamentu no est obligatòriu e in nisciunu casu ddu podet èssere pro more de sa costitutzione italiana e de is leges in contu de privatesa, ma su guvernu italianu isperat de cumbìnchere prus gente cun una publitzidade prus manna in is dies chi benint.

Google at annuntziadu un'acuntessimentu pro su 3 de làmpadas a is 17:00, in ue at a presentare sa beta de sa versione 11 de su sistema operativu Android.
In s'acuntessimentu, chi ddi narant "Beta Launch Show", s'at a chistionare de is funtziones noas de su sistema e de is noas dedicadas a is isvilupadores.
At a sighire una sessione de pregontas e rispistas in ue totus ant a pòdere iscrìere is pregontas cun s'impreu de s'hashtag #AskAndroid.