Si bollu sinnalai un'idea de interessu po favoressi sa localisadura de totu is programmas e, pruschetotu, donai sa possibilidadi a is regionis linguìsticas de minoria de tenni programas furriaus in sa lìngua insoru.
Seus chistionendi de su Manifestu po una tecnologia linguìstica aberta, chi totus podeus firmai in su giassu web suu.
Su Lenovo ThinkPad X1 Fold est su primu portàtili cun schermu mugiaditu. Bessiu apustis de duus annus de traballu, est un'elaboradori de 13,3" cun processori Intel Lakefield, 8GB de RAM e 1TB de discu fissu. Est compatìbili cun su standard 5G e impreat Windows 10 cumenti sistema.
Oi est sa dii de is programadoris. Sa festa est connota a manera ofitziali in Rùssia sceti, innui, arrespundendi a un'arregorta de firmas, su guvernu at decìdiu de dedicai custa festa a is programadoris po s'importu insoru a su svilupu de sa sociedadi. Sendi chi is programadoris funt una comunidadi internatzionali, no est cosa stròlica a si fai is augùrius, mancai no siat dii de festa ofitziali a foras de sa Rùssia.
Cun unu messàgiu curtzu, Toshiba at decrarau in su giassu suu chi at lassau sa cuota sua de Dynabook a sa Sharp. Dynabook est su nòmini nou de Toshiba Client Solutions Co., Ltd a pustis chi Sharp nd'at comporau sa parti manna. In custa manera, Toshiba est bessida a foras de su setori de is elaboradoris personalis.
Una de is noas de importu prus mannu in sa cunferèntzia de is svilupadoris de Apple de ocannu est sa decisioni de lassai is processoris Intel apustis de 15 annus po impreai is processoris insoru, is Apple Silicon.
Sa BBC at publicau sa noa de s'imbìstigu de sa politzia de Londra apitzus de unu grupu chi est bendendi unu dispositivu, su 5GBioShield, chi "Po mèdiu de unu protzessu de tzàntzigu cuànticu abalantzat e re-armonizat is frecuèntzias strumbulladoras chi benint de s'impestadura elètrica ingendrada de dispositivus comenti elaboradoris mòbilis, telèfunus chena filus, wi-fi, tauleddas, et cetera".
Eus festau is annus de TDE calincuna dii a oi e de virus nd'intendeus fueddendi fintzas tropu in custu annu stròlicu 2020. Calincuna dii a oi perou est stètiu su de 20 cumpleannu de un'àtera genia de virus – unu bermi po essi prus precisus – chi fiat famau meda po unu pagu de tempus: ILOVEYOU.
Nd'eus a amentai a manera curtza sa stòria e eus a giai un'ograda de curtzu a su còdixi de custu malware.
In custas diis de isulamentu seus in medas a traballai in domu, e fintzas a impreai elaboradoris, cellularis e tauleddas pro istentu. Calisisiat s'ocupatzioni nosta, su chi est seguru est chi seus sèmpiri connètius in retza e calincunu si nd'est aprofitendi po circai de violai is sistemas informàticus.
Totus, in una manera o in s'atra, seus contribuendi a gherrai contra custa pandèmia, chini ocupendi-si de is mobàdius, chini donendi calincunu soddu a su prontu sucursu e chini abarrendi in domu po evitai casus nous.
Seti@home est su càrculu distribuiu po s'elaboratzioni de is datus chi benint de su progetu SETI (Search for Extraterrestrial Intelligence, Circa de abistesa extraterrestri).
