Bos bògio sinnalare un'idea de interessu pro favorèssere sa localizadura de totu is programmas e, prus che totu, donare sa possibilidade a is regiones linguìsticas de minoria de tènnere programmas furriados in sa limba issoro.
Semus chistionende de su Manifestu pro una tecnologia linguìstica aberta, chi totus podimus firmare in su giassu web suo.
Su Lenovo ThinkPad X1 Fold est su primu portàtile cun ischermu mugiaditu. Essidu a pustis de duos annos de traballu, est un'elaboradore de 13,3" cun protzessore Intel Lakefield, 8GB de RAM e 1TB de discu fissu. Est cumpatìbile cun s'istandard 5G e impreat Windows 10 comente sistema.
Oe est sa die de is programmadores. Sa festa est connota a manera ufitziale in Rùssia isceti, in ue, rispondende a una regorta de firmas, su guvernu at detzìdidu de dedicare custa festa a is programmadores pro s'importu issoro a s'isvilupu de sa sotziedade. Sende chi is programmadores sunt una comunidade internatzionale, no est cosa istròlica a si fàghere is augùrios, mancari no siat die de festa ufitziale a foras de sa Rùssia.
Cun unu messàgiu curtzu, Toshiba at decraradu in su giassu suo chi at lassadu sa cuota sua de Dynabook a sa Sharp. Dynabook est su nòmine nou de Toshiba Client Solutions Co., Ltd a pustis chi Sharp nd'at comporadu sa parte manna. In custa manera, Toshiba est essida a foras de su setore de is elaboradores personales.
Una de is noas de importu prus mannu in sa cunferèntzia de is isvilupadores de Apple de ocannu est sa detzisione de lassare is protzessores Intel a pustis de 15 annos pro impreare is protzessores issoro, is Apple Silicon.
Sa BBC at publicadu sa noa de s'imbìstigu de sa politzia de Londra a pitzus de unu grupu chi est bendende unu dispositivu, su 5GBioShield, chi "Pro mèdiu de unu protzessu de tzàntzigu cuànticu abalantzat e re-armonizat is frecuèntzias istrumbulladoras chi benent de s'impestadura elètrica ingendrada dae dispositivos comente elaboradores mòbiles, telèfonos sena filos, wi-fi, tauleddas, etzètera".
Amus festadu is annos de TDE carchi die a oe e de virus nd'intendimus faeddende fintzas tropu in custu annu istròlicu 2020. Carchi die a oe però est istadu su de 20 cumpleannu de un'àtera genia de virus – unu berme pro èssere prus pretzisos – chi fiat famadu meda pro unu pagu de tempus: ILOVEYOU.
Nd'amus a ammentare in manera breve s'istòria e amus a dare un'ograda dae curtzu a su còdighe de custu malware.
In custa dies de isulamentu semus in medas a traballare in domo, e fintzas a impreare elaboradores, tzellulares e tauleddas pro istentu. Cale si siat s'ocupatzione nostra, su chi est seguru est chi semus semper connètidos in retze e calicunu si nd'est aprofitende pro chircare de violare is sistemas informàticos.
Totus, in una manera o in s'àtera, semus contribuende a gherrare contra custa pandèmia, chie ocupende·si de is malàidos, chie donende carchi soddu a su prontu sucursu e chie abarrende in domo pro evitare casos noos.
Seti@home est su càrculu distribuidu pro s'elaboratzione de is datos chi benent de su progetu SETI (Search for Extraterrestrial Intelligence, Chirca de abbistesa extraterrestre).
