Traballu e ispàssiu in retze: atentzione a is atacos

Traballu e ispàssiu in retze: atentzione a is atacos

Seguresa in retzeIn custa dies de isulamentu semus in medas a traballare in domo, e fintzas a impreare elaboradores, tzellulares e tauleddas pro istentu. Cale si siat s'ocupatzione nostra, su chi est seguru est chi semus semper connètidos in retze e calicunu si nd'est aprofitende pro chircare de violare is sistemas informàticos.

Su problema no est de pagu contu, si cunsideramus chi elaboradores cun informatziones aziendales chi diant pòdere èssere furadas, ma so seguru chi fintzas bois àteros chi seis connètidos cun s'elaboradore personale non diais a èssere cuntentos de bos fàghere furare fotografias e àteros datos personales.

Sa tècnica prus comuna e prus fàtzile est a chircare de guadangiare s'aficu de is usuàrius cuntatande·ddos cun contos farsos e imbiende·ddi programmas chi cuntenent virus e chi, una borta installados, aberint sa ghenna a intrusos, ma ddoe sunt fintzas atacos prus rafinados chi isfrutant debilesas de aparatos de retze comente a modem, commutadores (switch) e incaminadores (router) pro iscocare su tràficu.

Pro nos amparare dae custos atacos depimus chircare de sighire unos cantos cussìgios de seguridade. Paret fàtzile in teoria, ma si nd'iscarèssere est cosa de unu momentu. Pro una lista cumpleta de cussìgios est mègius a pedire a un'espertu chi fatzat un'anàlisi cumpleta de is elaboradores e sa retze nostra, ma is prus comunos sunt:

  1. Mantènnere is elaboradore annoados cun is ùrtimas versiones de is programmas e is aparatos de retze cun is ùrtimos firmware a disponimentu. 
  2. Impreare craes de atzessu fortes, chi tèngiant lìteras mannas e piticas, nùmeros e caràteres ispetziales. Custas depent abarrare semper segretas. Mègius ancora, impreare unu sistema de autenticatzione dòpia, cun crae temporànea imbiada a su telefoneddu.
  3. Impreare elaboradores diferentes pro traballu e fainas personales, cando possìbile.
  4. Is comunicatziones intre is traballadores e is ufìtzios si diant dèpere fàghere pro mèdiu de una VPN.
  5. No imbiare datos personales o de importu pro mèdiu de connessiones chi non siant tzifradas. Pro esempru, insertare sa crae de atzessu a unu giassu web isceti chi su sìmbolu de su luchetu est ammustradu acanta a s'indiritzu suo.
  6. No iscarrigare programmas e datos dae Internet cando no semus seguros chi bèngiant dae orìgines fidadas.
  7. Fàghere atentzione a su chi benet dae is programmas de messagìstica e dae sa posta eletrònica. Fintzas cando s'imbiadore est una persone nòdida, est mègius a pedire sa cunfirma chi apat de a beru imbiadu is datos.
  8. Cando una crae de intrada depet èssere cumpartzida cun unu collega, non depet èssere imbiada pro mèdiu de messàgios de testu. Mègius una tzarrada a boghe.

Cummenta

Categorias