Su progetu seti@home at a essi ibernau

Seti@home est su càrculu distribuiu po s'elaboratzioni de is datus chi benint de su progetu SETI (Search for Extraterrestrial Intelligence, Circa de abistesa  extraterrestri). Esistit de prus de 20 annus e prus de 5,2 millionis de personas ant aderiu, ponendi a disponimentu una parti de sa capacidadi de càrculu de is elaboradoris insoru.

S'Universidadi de Berkeley at annuntziau chi no at a imbiai prus datus de elaborai a incumentzai de su 31 de martzu 2020. Is arraxonis po custa decisioni funt:

1. Totu is datus chi serbint po immou funt stètius analizaus.
2. Manigiai su càrculu distribuiu est unu traballu mannu e sa prioridadi immou est s'anàlisi de is datus torraus de s'elaboratzioni.

Su progetu est sceti ibernau po su momentu, ma no est mortu. In prus, sa prataforma impreada po s'elaboratzioni automàtica de is datus, BOINC, podit essi impreada po atrus progetus e is impitadoris funt cumbidaus a ddu fai, ca nci-nd'at de importu mannu.