Bendint dispositivus anti-5G ma funt sceti crais USB

Sa BBC at publicau sa noa de s'imbìstigu de sa politzia de Londra apitzus de unu grupu chi est bendendi unu dispositivu, su 5GBioShield, chi  "Po mèdiu de unu processu de tzàntzigu cuànticu abalantzat e re-armonizat is frecuèntzias strumbulladoras chi benint de s'impestadura elètrica ingendrada de dispositivus comenti elaboradoris mòbilis, telèfunus chena filus, wi-fi, tauleddas, et cetera".

Un'averìguu de is dispositivus at perou acrarau chi no funt àteru chi crais USB de 128 MB de su valori de £5, bèndius po £339 (pagu mancu de 380€), una trampa pensada po aprofetai de sa timoria e s'innioràntzia de meda genti a innantis a custa generatzioni noa de standard te comunicatzioni. S'annùntziu cuntenit medas fueddus chi no tenint sentidu ma chi faint efetu in is chi ddus ligint, comenti catalizadori ologràficu a nano-pìgiu o a foras de calisisiat cuntestu, comenti tzàntzigu cuànticu, chi eus giai atobiau.