Programmas po elaboradori

Mi parit de s'intendi domandendi "eMule? Ancora esistit?". Difatis, eMule fiat famau meda in is primus 10 annus de su 2000 comenti servìtziu po scarrigai mùsica, pellìculas e programas, ma a pustis medas funt colaus a Torrent e prus tradu a is prataformas de streaming. Su progetu de eMule no est mai mortu, mancai no apat arriciu annoamentus po 10 annus, e si preparat imoi a ndi bessiri cun sa versioni 0.60a. Sa beta est giai a disponimentu e bitit càmbius de interessu.

Est stètiu po meda su navigadori de impreu prus mannu in su mundu, dd'eus odiau meda comenti impitadoris e comenti svilupadoris web. Dd'eus mudau cun Firefox e Chrome arregordendi-ddu comenti esempru de navigadori coaxu, pagu seguru e pagu arrespetosu de is standard. Fiat craru de diora chi Internet Explorer fiat morrendi e imoi est ofitziali: sa versioni 11, publicada in su 2013 at a essi s'ùrtima. S'amparu acabat su 17 austu de su 2021.

Su progetu FreeDOS at organizau po su 29 de làmpadas a is 16 de s'oràriu nostu, un'atòbiu po festai is 26 annus de atividadi.

Microsoft at annoau su sistema operativu suu in Maju cun sa publicatzioni de Windows 10 May 2020. No est unu càmbiu cumpriu de sistema, ma un'amelloramentu mannu de is funtzionis de su sistema chi esistiant giai. A dolu mannu, is impreadoris chi ant installau custa versioni noa ant tentu medas problemas.

Apustis de s'ùrtimu annoamentu, Telegram amostrat unu messàgiu chi cumbidat s'impreadori a cambiai versioni de su sistema operativu cun una a 64 bit o no at a podi annoai Telegram incumentzendi de su 1 de cabudanni.

A un'annu e mesu de sa publicatzioni de sa primu beta, un'àteru passu cara a sa prima versioni stàbili de Haiku, sistema cloni de BeOS chi bos'apu giai presentau pagu tempus a oi. Sa noa de sa bessida de sa beta 2 est de ariseu e deu dd'apu proada me is primas oras de notesta. De sighida s'arrelata.

Po sa felicidadi de is amantiosus de is elaboradoris de is annus 80-90, est acanta a bessiri una versioni noa, 1.3, de FreeDOS, unu sistema operativu chi clonat MS-DOS, su sistema Microsoft abandonau a pustis de sa publicatzioni de Windows 95 e benidoris.

Is chi ant incumentzau a imparai sa programatzioni me is annus 80 ant de seguru impreau a su mancu una borta GW-Basic, unu compiladori a lìnia de cumandu distribuiu cun MS-DOS. Microsoft at decìdiu de publicai su còdixi de orìgini po impreu didàticu, cumenti annuntziau in su diàriu de programatzioni suu. 

Su progetu de Haiku at publicau giai de calincuna cida unu resùmini de s'atividadi de abrili, chi donat una noa bella: si previdit sa publicatzioni de sa versioni Beta 2 a sa fini de maju, 1 annu e mesu a pustis de sa prima beta. Intra is mellorus chi custa versioni at a bitiri ddoi at una stabilidadi prus manna in su suportu de vàrius tipus de perifèricas e in is prestatzionis.

Trinity Desktop Environment (TDE) est un'ambienti de scrivania po sistemas Unix/Linux, derivau de KDE 3.5 e nàsciu su 29 abrili 2010 candu KDE est lòmpiu a sa versioni 4, po fruniri un'ambienti bellu, arricu, cumpriu e stàbili.